U Montri Rangbah u Conrad Sangma wa u Symbood Montri Rangbah ka jylla u Prestone Tynsong ynne ka sngi da wan wai ki ya ka yung esikai namo ka New Block yong ka Industrial Training Centre (ITI), Tura ya kawa da chna lyngba ka Supporting Human Capital Development in Meghalaya yong ka Asian Development Bank (ADB), hei lut iwa T. 7.76 klur kawa thmu wow pynjanai ya i esikai.
Ya kani ka ITI da sdang nadooh u 1965, heiwa da esikai 3 jait ki kaam (Trade) kiwa kynthup ya ka Welder, Fitter wa Carpentry wei da sdang ya ka Stenography ha u 1975, Mechanic Motor Vehicle ha u 1976, wa Electrician ha u 1981.
Ka ‘Vocational Training Improvement Project’ yong ka World Bank da sdang ya ka ha u 2014 deiwa sdang ya ka Surveyor, Draughtsman Mechanical wa Draughtsman Civil.
I chna ya i yung thymme ka ADB da sdang i hadien wa sdang ya ka esikai Electronics Mechanics, Dressmaking, Catering & Hospitality Assistant wa Operator Advance Machine Tools.
Ha u 2015, da pynboon yeiwa ye u chim khynnah na ka 206 cha ka 348 ngut wei i pynboon ya kiwa chah hikai na ki 128 ha u 2015 cha 265 ngut ha u 2020/21.
Kani ka ITI da hikai ko palat 600 ngut nadooh u 2010 wei da yoh kreh ki ha ki Telecom industry wa kamjooh ki chnat sorkar.
U Conrad hawa e yei klam da ong u wa i esikai ha kini ki kaam yoh kreh toh iwa emkaam bha heiwa man u snem 50,000 ngut da mih thymme kiwa kwah kreh katwa kamtæ emkaam bha wow pyrkhat ya ka mynried yong ki.
Neiliang u Prestone Tynsong da pynchlur u ya ki khynnah heiwa ka sorkar da pynku ko ya ka Stipend ya ki khynnah wa chah hikai ha ki ITI.
