U Montri Rangbah ka jylla Meghalaya, u Conrad K Sangma ynnin ka 9 tarik da wai u ya ar tylli ki Stadium ha ri-loom Garo kawi toh ka Chenanggre Stadium kawa em ha Adokgre, North Garo Hills deiwa emlang u Deputy Speaker, u Timothy D Shira wa ki MLA wa kynthup ya u Marcuise Marak, u Rupert Momin wa u Marthon Sangma.
Ya kani ka Stadium da wai emburom deiwa kynmoo u Conrad u ya pa u, u tynde u Purno Agitok Sangma, deiwa ong wa u pa u toh uwa maya bha ya ki paaid ka Adokgre kamjooh ki bru kani ka thaaiñ.
Da ong u wa kani ka Stadium toh kam kawi na ki thong u Purno neibynta ki paidbah. Da khana u wa ka sorkar da sdang ko boon ki kaam pynroi ha waroh ki kdong ki chmiang ka jylla.
Chooh chooh da ong u wa ka sorkar u pteiñ ko wow wanrah ki kaam pynroi ha North Garo Hills neibynta i bha kiwa boon wa lang.
Ya kani ka Stadium da chna hei lut wa T. 17.28 klur.
Yei pyrtuid kani ka Stadium da yoh neiwa jooh siñ u Purno yeini i chnong Adokgre deiwa khut ya ka Chenanggre iwa mut i chnong wa wanrah yei jop.
Hadien ini, u Conrad da wai u ya ka Hamilton Stadium wa em ha Bakenang Nalsa Bajengdoba ha North Garo Hills hi deiwa emlang u Deputy Speaker, u Timothy D Shira, ki MLA wa kynthup ya u Pongseng Marak, u Marcuise Marak, u Marthon Sangma wa kiwi de kiwa chah khut sñiawbha.
Ya kani won ka Stadium da chna hei lut wa T. 3.01 klur.
Hawa e yei klam, u Conrad da ong u wa kani ka Stadium toh enibynta ki paidbah ka Bajendoba, deiwa pynrap wa ka sorkar kwah ko wow e ya ki thaw yalehke wa bha neibynta ki khynroo wei daw e poisa chooh chooh yow chna ya kiwi kiwa emkaam yow pynheh chooh chooh ya ka Stadium.
