U Montri Rangbah ka jylla, u Conrad K Sangma ynne da wai paidbah u ya ka Commemorative Artistic Mural wa dang dep pynchna dur hei thaw psiah cha ka State Central Library wei kamjooh yei chna pynmiat ya ka U Soso Tham Auditorium heiwa da kaweh lama leh kamjooh ya ka Museum on Wheels wa pynyoo dur ya kiwa yaleh wow pynyoh jylla. Ha kani ka sngi da emlang u Symbood Montri Rangbah, u Prestone Tynsong, u Montri ka chnat Arts & Culture, u Shanbor Shullai wa kiwi de ha pchem ka State Central Library, Shillong.
U Conrad K Sangma hawa e i klam da e khublei u ya ka Arts & Culture Department wa da wanrah lang ko yei dur ki syntu wa ki mrad ha ka Artistic Mural iwa daw yarap pynmiatdur chooh ya ka sor Shillong wei daw man ko leh kamwa khana parom chaphang ka jylla.
Da ong u leh wa ka U Soso Tham Auditorium toh kawa emkaam bha ka thaw wa jooh pynman ya ki yalang ka sorkar wa kiwi ki jait yalang wei da ieh ya ka khlem da pynchna pynmiat da boon snem. “Da man i i sarong wa kattu daw ye ko wow man katkam ka juk wa katni deiwa emlut ya iwa bha tam hapoh kani ka Auditorium,” da ong u Conrad.
Da pyntip u wa da pynkhreh wow chna pynmiat ya ki Auditorium ha Tura wa Jowai kamjooh ha kiwi ki District Headquarter.
Chooh chooh da pyntip u wa ka Shillong International Centre of Performing Arts and Culture (SICPAC) ha Mawdiangdiang leh da jan pyndep chna ya ka deiwa ong wa hawa kwah i u pynyoo yei mahajon ka dustur riti, emkaam leh ya ka rynsan ya kiwa em yei sap wow pynyoo ki yeiwa ye ki u leh.
Da kyntu u leh ya ki paidbah wow pynneh yei miat ka State Central Library wa kiwi ki thaw ha ka jylla dei mynsien wa sñiawtre ya ki.
Ha kani ka sngi da pynlait leh ya ki kot wa yatoh wa ka jylla.
