U Montri Rangbah ka jylla, u Conrad K Sangma ynne da wai u ya ka yung thymme ka A’konggre Secondary School, Tura, West Garo Hills hei emlang u MLA, u Thomas A Sangma wa kiwi kiwi.
Ya kani ka yung da chna ha i lut wa T. 1.47 klur lyngba ka Supporting Human Capital Development in Meghalaya yong ka Asian Development Bank wei ha kani ka yung da em ki kamra (Classroom), ka Science Lab, Computer Lab wa ki Digital Classroom.
U Conrad da ong u wa na ka T. 16,000 klur wa da pynlut da ka jylla kamwa T. 2700 klur da lai ko chi snem cha i stat i tip wa kynthup ka tulop kiwa sikai, ki yung skur wa kiwi kiwi.
“Kamwa 20% na ka mang tangka ka sorkar jylla ha ka chi snem lai ko cha i stat i tip,” da ong u Conrad.
Heiyatoh wa i pynku kyrdan ya ki skur, kamwa T. 200 klur toh neibynta wow pynku ya ki Elementary School ha ka jylla deiwa pynrap leh wow pynlut sa T. 170 klur ha uni u snem.
Chooh chooh da pyntip u wa palat 2500 tylli ki Government LP School daw chna pynmiat ya ki ha i lut wa T. 2-3 lak, wei kamwa T. 45 lak kawi ka skur na ki 78 tylli ki Government LP School kiwa da jæd da pai bha katwa ki 11 tylli ki Secondary wa Higher Secondary School u yoh yarap ki T. 3-4 klur wow pynthymme ya ki yung wa ki thaw esikai.
