U Montri Rangbah ka jylla, u Conrad K Sangma ynne da wai u ya ka yung krehkaam wa thymme wa da yarap poisa ka NEC waka ka RUSA yong ka College of Teacher Education (PGT) ha Shillong kamjooh ya u sarok wow lai cha kani ka thaw deiwa ya emlang leh u Symbood Montri Rangbah, u Prestone Tynsong wa u Commissioner & Secretary, Education, u Dr. BDR Tiwari.
Hawa e yei klam, u Conrad da ong u wa joor bha i yaknieh thaw puræ ha kani ka College kamtæ da emkaam wow pynheh ka wei da sñiawkmen u wow yoo ya iwa da ye u chna. Da ong u leh wa ka puræ puthi toh kawa em hakhmat dooh kani ka sorkar wei i pynbiang yei duna ym toh iwa ye u pynbiang smat wei kawa chimpor. Wei da pyntip u leh wa ya ka dan wa yoh lyngba ka Cess ki mar pohkhyndaw da pynemkaam ha ki kaam wa yatoh wa i puræ puthi.
Da khana u leh wa ka sorkar da bhah ko ya ka poisa neibynta waroh ki chnat deiwa khlem leh chiliang neibhah kamwa emkaam ka puræ puthi emkaam leh i chait i khiah, u chna sarok, i rep i riang wa kiwi de kamtæ hap u pyrkhat neibynta kini waroh wei i yarap poisa ya ka chnat puræ puthi leh da man ko kawa eh bha tangwa deiwa leh kajiak chisien daw ye u wanrah yei kylla.
Da ong u leh wa i e sikai ya kiwa sikai leh man ko kawa emkaam bha wei ki e sikai yong ka sorkar toh yow pynpliah yei sap kiwa sikai, kamtæ da kyntu u ya kani ka College wow pteiñ yei kaam wa bha yong ka.
