U Montri Rangbah ka jylla, u Conrad K Sangma ynne hapoh ka FOCUS ha Byrnihat, Umling C&RD da ong u wa ki Self Help Group (SHG) da wan ki chaphrang wow pynkupbor ya ki kynthai, ki manbei wow man kiwa laitlooid wei kiwa ye wow yieñ ha ki kjat yong ki hi.
Da ong u wa ha u 2018 da em du 3,000 tylli ki SHG wei katni da em 35,000 tylli ki SHG wei da ye u e yarap hadooh T. 200 klur cha ki.
Ha kani ka sngi da saam leh ya ki Cheque wa kynjoh T. 49.90 lak cha ki 16 tylli ki Village Organization.
Neiliang u Conrad ynne ka sngi da wai paidbah u leh ya u sarok chnong ka Lum Nongthymmai, Byrnihat uwa 800 Meter uwa sdang na 8 Km Byrnihat. Ka sarok Shillong-Guwahati NH-06 cha Lum Nongthymmai wa pynyabi leh ya ka PHC wa ka Dorbar Hall ka chnong. Ya uni u sarok da chna lyngba i yoh poisa ha u Wisu (March) 2020 wei da pyndep ha u Naitung (April) 2022 ha i lut wa T. 1 Klur.
U Conrad ynne ka sngi da pyntip u wa daw pynku kyrdan noh leh ya ka Byrnihat PHC kam ka CHC wow pyndap yeiwa emkaam ki paidbah ka thaaiñ.
Heijooh i por u Conrad da booh u leh ya u mooyurim neibynta ka Multifacility Centre ha ka yalang wa pynman ha Moonlight School, Byrnihat lyngba ka Grants-in-aid katkam ka Article 275(1) yong ka riti synchaar ka ri (Constitution of India), ka Ministry of Tribal Affairs, ka sorkar India wei da pynlait leh T. 60 lak ya ka District wow pyndep ko ya ki kaam bhalang. Ya kani ka poisa da mang ha u 2017-18 toh wow rah ya ka Multifacility Centre na Korhadem cha Byrnihat, Umling C&RD da ka Directorate of Community & Rural Development, Government of Meghalaya ha u Thohlakhmi (February) 2022 heiwa ka MFC u e laad ko ha kiwa boon ki liang nadooh i esikai wow pynboon ya ki mar rep wa kiwi kiwi ki wow myntoi ka imlang sahlang.
