U Montri Rangbah ka jylla, u Conrad K Sangma, ynne ka sngi da wai u ya ka madan Artificial Turf wow yalehbol wa em ha Chandmary, Tura kawa da pynlut T. 5.4 klur neibynta u phlang Artificial Turf hei emlang u Thomas A Sangma, uwa e buit ya u Montri Rangbah wa kiwi kiwi.
U Conrad da ong u wa i wai ya kani ka madan da kyrmen wow mih chiboon ki khloor yalehke Football na ka thaaiñ wei da pyntip u leh wa daw pynlut sa T. 3 klur wow chna ya ki thaw chongke.
Da pyntip u wa chibynta wow pynku ya ki kaam yalehke da jan pyndep ya i kreh ha ka Indoor Swimming Pool ha Tura wei daw chna pynmiat leh ya ka Tura District Auditorium ya kawa daw pyndep ha u Wisu (Mar).
Da pyntip u leh wa i kreh ya ka Convention Centre-cum-Auditorium kawa T. 150 klur ha Dakopgre, Tura da lai i chakhmat. Chooh chooh da khana u wa da dep chna pynmiat ya ki laad (Junction) kam ka Chandmary, Ringrey, Hawakhana wa Araimile ha i lut wa T. 20 klur.
U Thomas A Sangma, da yaroh u ya u Montri Rangbah wa da ye u wow wanrah ya kani ka madan wow pynchlur ya kiwa lehke Football.
Ynne ka sngi da sdang leh ya ka lympung South Tura MLA Cup Football Tournament 2022.
