Shillong: U Montri Rangbah ka jylla u Conrad K. Sangma ynne ka sngi da wai u yaka nyngkong dooh hapoh ka jylla kawa tip kam ka Custom Hiring Centre (CHC) ha chnong Kyiem, East Khasi Hills District, hei emlang u MLA ka Mawphlang u S.K. Sunn.
Kani ka Custom Hiring Centre toh ka wow pynchlur yow pynemkaam yaki kor rep kamjooh yow yarap heipor wa duna bru wakreh.
U Conrad da ong u wa hapoh ka jylla da em kamwa 5 lak ngut ki manyung wa em cha thaaiñ palatsor kiwa boon naki toh kiwa kyrchaan hei rep, kamtæ emkaam wow pynyoh kor rep yaki hei dor wa duna yow pynboon yeiwa ye u rep iwa daw pynku leh yei nong.
Chooh chooh da ong u wa 1350 tylli ki chnong daw yoh myntoi ki na kani ka Centre kawa da sdang da ka MBDA wei da tyrwa leh wow booh sa 72 tylli kam kini ki thaw yow ye ki warep wow chim wai yaki tiar rep hei dor wa toh iwa daw pynlait yaki wow hap ki wow thied yaki tiar rep kiwa syad dor.
U symbood kongsan u S.K. Sunn hawa e yei klam yong oo da ong u wa i yoh wow chim wai ya kini ki tiar, ki kor rep daw yarap bha ko ya ki warep ka thaaiñ iwa daw pynduna leh yei por wa da hap wow pynlut iwa heijooh i por leh pynboon i yeiwa ye u pynmih.
Ha kani ka sngi u Montri Rangbah da saam u leh yaki nardiñ kiwa tip kam ki Smokeless Cooking Chulhas cha kiwa yoh myntoi kani ka chnong kiwa chna daka Soil and Water Conservation Department.
Kiwi de kiwa klam ha kani ka sngi toh ka Deputy Commissioner& Chairman Basin Development Unit East Khasi Hills ka I. Laloo.
