Shillong: U Montri Rangbah ka jylla Meghalaya u Conrad K. Sangma, ynne ka sngi da wai u yaka Website ka Meghalaya Tourism – ‘Check into Nature’ hei emlang u Commissioner & Secretary Tourism u Vijay Kumar, u Director ka Tourism u Cyril Diengdoh deiwa emlang leh kiwi kiwa em haka kaam Tourism hadooh kiwa pynlai yaki thaw sah kiwa da chimbynta lang lyngba ka Video Conference.
U Conrad da yaroh yaka chnat Tourism yeiwa da ye ko wow wanrah ya kani ka Website kawa daw yarap ya kiwa wanke cha Meghalaya.
Hawa e yei klam cha kiwa embynta lang lyngba ka Video Conference, u Montri Rangbah da ong wa kini ki bnai wa da lai da man ki kiwa eh bha yaki kaam uiñke suwari wa da hap wow khang yei kaam yong ki neidaw ka khlam wei da hap wow thooh ki laad yow taan biang ya kiwa uiñke suwari cha Meghalaya kam ka thaw wa miat wa biang hadien ka khlam COVID-19.
“Ki kaam wa hap wow leh yow jop em ki boon jait. Ha wow pait yei man chngaaiñ wei wow yada, yow sñiaw chlur kiwa wan uiñke, wei hap leh wow man kiwa smat wow leh ya iwa emkaam katkam wa man i por yow bien boon wow wan cha ka jylla neibhah nga sñiaw O wa daw duna ki bru wa daw bien u lai cha baar neiwa em ki tangwa daw boon won kiwa em chajan kamjooh kiwa em hapoh ka ri kiwa daw wan cha ka jylla yong i,” da ong u Conrad.
Da ong chooh chooh u wa ka sorkar da rai skem ko wow pynku yaka kaam uiñke suwari iwa daw yarap ya kiwa wanke wow maad ki yeiwa em kiwa rap phær hapoh ka jylla.
Da ong leh wa iwi na iwa emkaam toh yow pynsuk u poi chapoh ka jylla wei ym slem de daw hær ki lieñsuiñ na Delhi cha Shillong wei ka sorkar da thmu ko wow leh yei jooh wa kiwi ki sorbah ka ri.
U Montri Rangbah da pynlait u leh yaka kot lakdop kawa e pyrtuid Restart Tourism ha kani ka yalang.
Ya kani ka Website ye phi wow yoh deiwa lai ha https://www.meghalayatourism.in/.
