Wai u Dr. Mukul ya ka Administrative Block ha Ranikor, pynyang ka KSU wa ka HYC da ki phang dawa

Shillong: Ynne ka sngi heipor wa wai u Montri Rangbah ka jylla u Dr. Mukul Sangma ya ka Administrative Block wa thymme ha Ranikor, ki dkhot ka Khasi Students Union wa kynthup ya kiwa na ka South West Khasi Hills District wa ka Ranikor Circle da ksoh Placard ki wow pynskem yei dawa wa emkaam u yoh da ka Civil Sub-Division wei wow wai ya ka C&RD Block ha thaiñ Wahkaji-Umdohlun.

Ki seiñbhalang da pynbaad ki wa u Dr. Mukul pynbiej paidbah u du neidaw wa daw wan ka Election MLA kattu.

Neiliang ka HYC da pdiang ko ya kani ka Administrative Unit tangwa da dawa ko wa emkaam u pynkrehkaam noh ya ka Inner Line Permit (ILP).

Neiliang ka KSU da pynche ko wa i yakhih wa suki toh wa ka sorkar pait chilliang ko ya ka thaiñ waroh kawi.

Related posts

Ka NPP jop ko da ki kaam pynroi, ymtoh da ka poisa: Conrad

November 27, 2024

Ym ye wow tuklar yeiwa takit ha NEHU: Conrad

November 27, 2024

“Ini i wan wai ya ka Administrative Unit toh du wow pynbiej bru neibynta ka Election 2018” da ong u Marconi Thongni, u President ka KSU Ranikor Circle.

“Ka Ranikor wa ka South West Khasi Hills toh ka thaw wa mad boon ki eh i kho wei man ko kawa emkaam ka sorkar wow kyruiñ yow yoo ko yeiwa dooh ki paidbah ya ki kaam pynroi “, da ong u Montri Rangbah.

“Nga e khublei O ya kiwa yahkhmat ka West Khasi Hills kiwa san snem nachwa kiwa krehlang wa ka sorkar wow pynkha ya ka South West Khasi Hills District kawa em Headquarter ha Mawkyrwat wow wanrah ya ka roi ka par cha ki paidbah”, pynrap u Dr. Mukul.

Da kdaw u leh wa ka tnat C&RD da mang poisa ko cha ka T. 1, 600 Klur wa ki paidbah toh u wan tur ki cha khmat yow yoh ki yei myntoi.

Ka sorkar leh da mang ko wow pynyabi ya ki sarok wow kyntu ya ki thaiñ palatchnong kani ka thain lyngba ka programme wa kyrpang wa tip kam ka Special Accelerated Road Development Programmes for North East ya kawa da soi soskular wa ka Sorkar India. Lyngba kani ka programme ya ka Phase 1 wa Phase 2 ye u pynsmat yei pynkreh ya ki sarok ong u Dr. Mukul.

Da pyntip u leh wa kawa nyngkong dooh toh ka Shillong – Nongstoin-Rongjeng – Tura Road kawa jrong 272 Km kawa lut T. 3, 000 Klur.

Waroh ki District Capital daw pynyabi ya ki da ki sarok bah kiwa tip kam ki 2-Lane wei ka Mawkyrwat daw yoh ko ya sarok na ka Bypass na Lad Mawreng chadooh Ranikor kawa jrong 109 Km wei ya kani ka poisa da dep pynkhreh.

Ha kani ka 1st Phase u kynthup ko ya ka sarok na Ranikor cha Baghmara-Maheshkhola kawa jrong 139 Km da pyntip u Dr. Mukul Sangma.

Ha kani ka sngi da puræ leh ya ka dorkhat wa dawa ya ka Civil Sub-Division wa thymme ha Ranikor da u Manstudy Nongrem uwa man leh u Chairman ka Civil Sub-Division Demand Committee wei da e kti u ya ka ha u Dr. Mukul uwa da klam che wa ka sorkar daw leh ko ya ini ha i por wa biang.