Jowai: U Deputy CEM ka Jaiñtia Hills Autonomous District Council u ma Andrew Shullai ynne ka sngi da wai paidbah u ya ka yung krehkaam ka Ladthadlaboh Dorbar Chnong, kawa man chi bynta wow pynpliah yei rukom krehkaam kamjooh yow pynkhlan yei chakri hapoh ka chnong.
Katkam i parom wa tbian wa khana u ma S. Bareh, Assistant Waheh Chnong da ong u, “Ha Ladthadlaboh dawan seiñ chnong nyngkong da kiwa na ka chnong Sutnga kiwa lait im nei chah pynmysoo ha u khla nadooh kipor warim kiwa da em 7 yung, kamtæ katwa dang lai ki por ka chnong dang heh dang kmai ko heiwa ha u snem 1942 da yoh ya ka Club wa paka wei wa daw leh kmen lyngkhooh dap 75 snem ka Dorbar Chnong Ladthadlaboh.
U kongsan u ma Andrew Shullai hei klam yong oo da kyntu u ya u Waheh Chnong wa ki Executive Member yow chimkhia ki ya ki kaam waphær waphær wa da pynkit ha ki da ka chnong yow yoh yei roi i par.
“Hawa kreh neibynta ka kaam imlang sahlang emkaam hi u em ya ka yung krehkaam katkam wa lai i por neibhah i em ka yung krehkaam kamjooh deiwa booh yei por krehkaam yarap ko u pyndep ya kiwa boon ki kaam yow lait u chim yei por yong ki bru wa chaniah ha ki wakreh yei kaam chnong” ong u symbood kongsan u Dolloi wa chipor ka Elaka Jowai u ma Puramon Kynjin.
Neiliang u Local MDC u ma Marki Mulieh da e u ya ki kyntien sneiñ kyntu ya kiwa yalam chnong Ladthadlaboh wa ya kiwa chong chnong yow krehlang ki yow neh i chong suk chong saiñ kamjooh yow yoh i roi i par ha chnong.
Kiwi won wa e ya i klam ha kani ka sngi kynthup ki ya u Waheh Chnong ka Ladthadlaboh u ma L.D. Lakiang, u President Synjuk Ryngbah Shnong Ri-loom Jaiñtia u ma Army Lypon wa kiwi kiwi katwa ya ki ktien e khublei da yoh na u ma A.B.M Shulai.
(Ya ki dur da e sniawbha da u Russel Nongrum)
Discussion about this post