15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Wai u Kyrmen Shylla ya i yung wa chna ka FKJGP neibynta ka manbei

Khliehriat: U MLA yong ka Khliehriat u Kyrmen Shylla uwa man leh u montri hapoh ka sorkar MDA uwa pait yaka chnat Social Welfare, ynne ka sngi da wai u ya kawi ka yung kawa da chna kyrpang da ka seiñ Federation of Khasi jaiñtia and Garo People (FKJGP) Bataw Unit, neibynta ka wi ka manbei ka wym em yung em sem, wym em payu para, wym em kurim de wei ya katai ka manbei da tip pyrtuid kam ka Airis Masa kawa em uwi u khon chynrang kawa chong wa sah haka chnong Bataw, East Jaiñtia Hills District.

Ha kani ka sngi da pynman leh yaka yalang haka chnong Bataw kawa pynlai da u D.H. Sumer uwa man leh u President ka FKJGP Bataw Unit hei emlang ki waheh waphær waphær ka chnong kiwa na mar jan chnong, da emlanglang leh u Waheh Chnong ka Bataw u Bhalang Suchiang wa kiwi kiwi, da emlang leh u K. Nongphlang uwa man u Chief Organiser yong ka FKJGP Central Body, u D.C. Khongsit uwa man leh u General Secretary ka FKGJP Central Body uwa man leh kam u symbood kongsan ha kani ka sngi, u Dr. S. Shangpung, Chairman yong ka JHADC uwa da wan kam u Special Guest katwa u Kyrmem Shylla da man u kam u kongsan.

U Kyrmen Shylla hawa e yei klam ha kani ka sngi da e u yei yaroh yaka FKJGP Bataw Unit kawa da ye wow leh kat ini i kaam neibynta wow pait yaki bru wa dooh wa duk haka imlang sahlang wa yaka jaitbru yong i, da kitbok kit rwiang u leh ya katai ka seiñ yow nang ye chooh chooh ko wow leh ya ki kaam wa bha neini cha khmat, da ong u leh ynne ka sngi da man ko ka sngi kawa sahkynmoo ya ka Airis Masa wa ka kam ka manbei kawa dooh wa duk ka wym em yung, heiwa da ye katai ka seiñ wow yarap yaka hadooh katni, deiwa ong chooh chooh wa nongkong toh u e yei yaroh ya u Blai uwa booh wa thaw wei kamjooh yaka FKJGP hi waroh kawi wa smat ko wow leh yei kaam wa bha taam haka imlang sahlang.

U Shylla da e yarap u neiliang yong oo da ki kymmor cha ki bei tymmen pa tymmen yong ka chnong Bataw kiwa da noh rta kiwa da em duna 30 ngut.

U S. Shangpung hawa e yei klam da e khublei kyrpang u yaka FKJGP Bataw Unit wa yaka Central Body waroh kawi wada ye ko wow leh kat ini i kaam kawa bha tam, da ong leh, ha-o sakhiat chisien pyrkhat man ko kawa eh wow chna kat kani ka yung wei ym toh iwa suk u pyndep yaka, wei kani toh ka seiñ kawa da pynyoo skhiat hakhmat ka pyrthai yei yatylli yong ka seiñ, heiwa da ye ko wow pyndep kat ini i kaam i wym ye wow leh khlem i yatylli yow poi cha ka thong. Da kitbok kit rwiang u leh ya seiñ wow im slem ko yow ye chooh chooh ko wow leh ya ki kaam wa bha neibynta kiwa dooh wa duk.

Ha kani ka sngi da yoh leh wow pynbaam smai ya kiwa kitkaam thymme yong ka FKGJP South Eastern Border Area Circle da u D.C Khongsit.

Advertisement ad1
Share this:
Previous

Daw sdang i chondur Aadhaar neibynta wow yoh myntoi rachon

Next

Pynkha chnat thymme ka East Jaiñtia National Council