Ha ka sngi sdang i lehkmen dap 25 snem ka Jowai Polytechnic ynne ka sngi, u Lahkmen Rymbui uwa man kam u Montri ka chnat puræ puthi uwa da wan emlang kam u kongsan, da wai haroh u ya ka Building thymme kani ka chlem puræ hei emlang u Montri ka chnat Sports & Youth Affairs, u Wailadmiki Shylla, u Manhiam Marbaniang, Chief Engineer State Sports Council, u Deputy Commissioner ka West Jaiñtia Hills, u Abhinav Kumar Singh, u Principal ka Jowai Polytechnic, u Strong Pillar Basaiawmoit, ki Principal na ki thaw puræ waphær, kiwa chah khut sñiawbha deilang wa kiwi.
Hawa e yei klam ong u kamwa kani ka chlem toh kawa e sikai heiyatoh wa i sap, kyntu u wow lehbha kamwa u Montri Rangbah ka jylla leh da e rynsan u ya waroh kiwa em sap.
Ong u leh ymtoh u pynbaad du yei rukom krehkaam neibhah lada wyrchaw ha ki 50 snem wa da lai, kini ki 8 snem wa dep toh kiwa ku smat bha ka jylla khamtam heiyatoh ka rynsan neibynta ki khynroo khyllood i wym ye mutdur.
Kamtæ kyntu u wow pait u sñiawthooh ya idæ iyi kwah i u leh wei toh u leh yeitæ.
Chooh chooh kamwa lai ka juk ka por wa hap pynthymme yei yi wa leh katkam wa yah ka juk, ong u iwa kongsan tam leh toh u pynthymme wot yei thij i pyrkhat.
“Neiliang ka sorkar da yaleh ko u pyntoh pyntne ha kiwa boon ki bynta wa yatoh wei puræ puthi, lada ya ki chlem e sikai, la heiyatoh ki tulop yong kiwa sikai wa kiwi katkam wa chah ka luti,” da ong u Lahkmen.
Heiyatoh i emkaam neibynta ka Laboratory, kular u wow pynbiang hapoh 3 bnai neibhah man i iwa emkaam wa hakhmat, katwa neibynta kiwi won kiwa emkaam ong u daw yachong bichaar yow pait bniah.
“Kani ka chlem e sikai ym du wa pynpliah ko yei sap tangwa e sikai haroh ko u sñiawskem u chaniah ya idæ wei wow ngait skem wa lyngba i chaniah i sñiaw skem u nang ku phi, wei ye u yoh yeiwa mang, najrong wow man kiwa jop dei wow chimkhia wei deiwa em leh i kitkhlieh yeitæ”.
Kyntu haroh u wym toh u sñiaw poh hawa kreh ya kawon kawon ka kaam lada toh kawa khian tam leh, neibhah em ko i dor yong ka.
Da pynkynmoo haroh u yei klam uwa yahkhmat ka VPP ha Jowai ini wadep uwa da ong u ki bru ka jylla wa kreh ha Hotel Vivanta wa Marriott kreh ki du hei kaam wa khian tam i kam wow pynkhooid donhi.
Heiyatoh wa ini da ban joor u wow kheiñkor ya iwon iwon i kaam wa leh, neibhah hawa ñiawkor daw man kiwa jop hei im.
Discussion about this post