Jowai: U montri ka puræ puthi, u Lahkmen Rymbui ynne da wai u ya ka Website, ki Hostel yong ki chynrang wa kynthai kamjooh leh ya ki Semi Smart Class Rooms ha Kiang Nangbah Government College hei emlang u MLA ka Jowai u W. Shylla, u MLA ka Mowkaiaw, u N. Sungoh, ki MDC ka JHADC, ki sahep sorkar wa kiwi kiwi.
U Lahkmen hawa e yei klam da pynsñiaw u yei mynsien wow e khublei ya waroh kiwa da embynta wow pynku kyrdan ya ka College hadooh ka kyrdan wa em ko katni, kam ya ka chnat puræ puthi, kiwa sikai, ki montri ka chnat na ri-loom Jaiñtia nadooh u Prof. R.C Laloo, Dr. B. Lamin, (Late) J. Pohrmen, (Late) Prof. B. Pakem, u M. Suchiang, u Nehlang Lyngdoh wa u Justin Sungoh kiwa da yaleh wow kyntu kynrong ya ka puræ puthi.
Da ong u wa ka sorkar tip ko yei eh i khoo wa takhooh ha kani ka bynta (puræ puthi) wei yaleh ko katwa ye wow pyndap yeiwa duna.
Da e khublei u leh ya kiwa sikai kani ka thaw puræ kiwa da pynmih ya ki khynnah kiwa poi chaphrang ha ki Exam yong ki deiwa ong wa kani ka College em sakhiat ko kiwa sikai kiwa pliah la ha ki kyrdan waphær waphær.
Da kyntu u leh ya ki khynnah wow em ki i kitkhlieh wei wa man i leh i kaamram yong ki wow pynneh wei wow pynkhooid ya ki Hostel wa dang dep wai wot kamjooh leh ya ki talawiar kani ka thaw puræ. Da kyntu u leh ya ki khynnah wow em ki ka mynsien wow sñiawtre wow syndong wow sumaar yeiwa em ha kani ka thaw puræ.
Da kyntu u leh ya ki khynnah wa ymhoi wow em ki ka mynsien wow silet ya ka jait puræ wa da jied ki neibhah emkaam wow pynwandur ya ki katkam ka juk wa katni wei wow husiar hawa pynemkaam ya ka Social Media.
Heijooh i por da kyntu u ya ki khynnah wow man ki kiwa rah ktien ya ki kaam wa man pyrchah aiñ khamtam kiwa man pyrchah ya ki kynthai wa ki khynnah ha ka imlang sahlang.
U Lahkmen da kyrmen u leh wa waroh ki Government College toh u tipmit (Accreditation) ya ki da ka NAAC wow yoh ki khynnah u pteiñ yei puræ yong ki wei hajrong ini daw chong yalang u leh wa u Principal wa ki sahep ka chnat ha ka 15 Tarik u Naikhynde hajrong kani ka bynta.
Ki ar ngut ki khynnah ka College kiwa da mih pyrtuid ha ka Result B.Sc Mathematics wa Physics u Bedingfield Lyngdoh wa ka Wandaka Langstang da pynkup burom ya ki ynne ka sngi chirup wa ka song poisa wa T. 5000 samen. Da pynkup burom leh ya ki khynnah kiwa da yoh First Division ha ka Result wa pynbna da ka NEHU ini wadep.
Ha kani ka sngi u Principal ka College da e u ya ki kyntien pdiang burom wei da khana u leh wa ya kini ki Semi Smart Class Rooms da chna lyngba i e yarap poisa ka Rashtriya Uchchattar Shikska Abhiyan (RUSA).
Discussion about this post