U Chairman ka Meghalaya State Planning Board uwa man leh kam u MLA/MDC ka Nongkrem Constituency, u Lambor Malngiang, ynne ka sngi da wai u yaka yung krehkaam ka Seng Samla Shnong Laitkor Pyllun ha Laitkor, Shillong deiwa emlang ka Deputy Commissioner, East Khasi Hills District ka I. Laloo.
Kani ka yung toh kawa da chna hapoh ka Chief Minister’s Special Development Fund 2019-2020 waka Outstanding Youth Club Award 2019-2020.
Hawa e yei klam, u Lambor Malngiang da ong u wa ini toh i jop yaki khynroo ka Constituency. Da yaroh u leh yei kreh chitom ka Seng Samla Shnong Laitkor Pyllun yow kyntu kynrong yaki khynroo, deiwa ong wa i embynta ki khynroo khyllood toh iwa emkaam yow ku ka imlang sahlang. Da e nongmuna u leh ya kiwa boon ki khusnaam wa da yoh daka Seng Samla Shnong Laitkor Pyllun, u Malngiang da pynsñiaw u yei kmen yaki kaam wa da leh ka Seng Samla yow lai pynkhooid wei wow siat dawai yaki skur ka Constituency ha kini ki por wa em ka khlam COVID-19. Da kyntu u leh yaka Seng Samla wow pynman yaki pynsñiawthooh paidbah yei maa wa mih nei dih kiad kamjooh i drugs kiwa man i maa yaki khynroo ka Constituency kamjooh yaka jylla waroh kawi.
Ka DC leh da yaroh ko yaki kaam wa bha ka Seng Samla ha ki 11 snem wa da lai luti ko wei da yooluti ko wa deiwa yoh ya kani ka yung krehkaam wa thymme, daw pynyoh bor chooh chooh ko yaki ha ki kaam wa leh ki. Chooh chooh da ong ko wa i embynta ki khynroo toh iwa emkaam wow pynku yaka puræ puthi, i pynneh yei chong suk, i khooid wa kiwi kiwi. Da kyntu ko leh yaki khynroo khyllood wow yait naki kaam wa sih wei wow bood yaki nongmuna wa bha ka Seng Samla Shnong Laitkor Pyllun.
Ha kani ka sngi, u Lambor Malngiang da e u leh yaki Work Order yow pynchna yaka Community Hall ha Laitkor Mawrie Lumheh iwa T. 5,00,000 wei yow pynheh yaka Community Hall ha Laitkor Nongdaneng iwa da e T. 6,00,000.