Ka lympung wa 24 ka Seiñ Kyntu Seiñ Raij 12 Daloi da sdang ko ynne ka sngi ha i por 10:30 i step wei da pynlai ya ka da Wom Chyrmang, President ka SKSR 12 Daloi wei da yoh leh wow pynhær ya ka lama ka seiñ da ki arngut ki manbei kiwa da heh rta kitæ ka Moi Dkhar wa ka Ple Lama.
Da pynbood won sa i ngooh Blai da u Merry Lyngdoh, Vice President ka Seiñ Khynroo Khyllood Seiñ Raij Rangad, iwa da pynbood da i chaad pdiang burom na ki khon khynroo ka Seiñ Raij Rangad wei kamjooh leh da yoh ya ki kyntien pdiang burom ya kiwa wan chimbynta cha kani ka lympung da u Chailang Dkhar, General Secretary ka Seiñ Raij Rangad.
Ynne ka sngi da yoh leh yei snieñ kyntu ya ki khon khynroo hajrong ka phang chongkha dang khynnah heiwa hajrong ini da klam da u Mario Biam, General Secretary ka Señkhihlang wei da pynman leh yaka pynsñiawthooh paidbah chaphang u khñiang COVID-19 iwa da batai da ka Risakaru Hadia.
Hadien ini, da yoh leh wow lai wai paidbah ya ki Moopynyieñ sahnaam ka lympung da u President wa u General Secretary ka Seiñ Kyntu Seiñ Raij 12 Daloi waka Seiñ Raij Rangad, wei hawa kut ka sngi nyngkong da yoh u pyndep yei khana chaphang ka rukom lehniam hapoh ka Seiñ Raij Rangad da u Langdoh Niam ka Raij u Dibha Khaii.