Jowai: U Chief Executive Member (CEM) ka Jaiñtia Hills Autonomous District Council (JHADC) u Madonbai Rymbai uwa man leh u MDC ka 4-Sohmynting-Khliehtyrchi Constituency ynnin ka 5 tarik da lai wai padibah u ya ka yungskur yong ka Moosyiem DC LP School kawa em ha ka dong Dein yong ka chnong Sohmynting, West Jaiñtia Hills District.
Ya katai ka yungskur da chna hei lut kamwa T. 10 lak kawa da yoh yarap naka sorkar pyrdi lyngba ka Special Assistant Central Plan Scheme yong u snem 2015-16.
Ya katai ka skur toh kawa da seiñ ha u snem 2016 wei em ko kamwa 100 ngut ki khynnah nadooh ka Class-A Rit hadooh Class-5 wei em ko kiwa sikai ar ngut.
Ha katai ka sngi ka SMC da e kti ko ya ka dorkhat ha u CEM wow dawa wow pynheh ya ki kamra Class, wei wow yarap wow chna ya ka kærkut ya ki soodong ka skur wei wow pynyoh wa sikai neidaw wa da boon ki khynnah na ki snem cha ki snem.
U Madonbai Rymbai hawa e yei klam yong oo da yaroh u ya kiwa pynlai ya ka skur kiwa kreh chitom u pyntikna wow pyndep yei kreh wow pyndep ya ka yungskur wa emkaam ki khynnah.
Hei yatoh wa i stat i tip da ong u wa man ko kawa kongsan dooh ka wow yarap ya uwi pa uwi ka wow kyntu ya ka roi ka paar ha ka imlang sahlang.
Da e mynsien u ya ki khynnah wa toh u sai ki ya i sap yong ki yow poi cha ka thong wei ha i jooh i por da kyntu ya ki bei ki pa wa kiwa sikai wym toh u e laad ya ki khynnah wow pep skur ki chiteiñ por neibhah daw ktah ko ya ka mynried yong ki.
Da ngait skhem u dei sñiawthooh yumut ki bei ki pa waka School Management Committee (SMC) kani ka skur daw ku kyrdan ko.
Heiyatoh won wa i emkaam yong ka skur da ong u wa daw pyrchang katwa ye i bor wow wanrah ya kiwa sikai nalor wow pynheh yaka yungskur lada chah i thaw wei heijooh i por da kyntu u ya ki paaid wa chong chnong wow man ki kiwa yaichah.
Kiwi dei kiwa da klam ha kani ka sngi kynthup ki ya u Monjur Pyrtuh, u E. Langshiang, ka Yokmen Langshiang wei da wan sakhi lang da ki manbei manpa ki khynnah skur nalor ki paidbah wa boon.
Waroh kiwa da klam da pynsñiaw ki wa man ki kiwa embhah na waroh soo tylli ki dong kiwa em ha ka chnong Sohmynting neidaw wa du ka Dein hi kawa da em hadooh soo tylli ki skur wei ha i jooh i por da kitbok kitrwiang ki ya u MDC wow ye chooh u wow thooh ki laad wa ki luti wow kyntu ya ka chnong ka thaw wa ka Constituency hi waroh kawi.
Discussion about this post