15 49.0138 8.38624 1 0 4000 1 https://wyrta.com 300 0

Wai u MLA ka Sohra ya ka Mawdngong Park, Mawlyndiar

0 Comments
Advertisement ad1

Shillong: U MLA ka Sohra Constituency, u Gavin M Mylliem, da pyntip u wa ym slem de daw pynkreh noh ya ka sarok na ka chnong Mawlyndiar cha ka chnong Sohkynduh na ka mang poisa yong ka Scheme Pradhan Mantri Gram Sadak Yojana (PMGSY) kawa man waroh ar tylli T. 5.56 klur kawa jrong 4.84 Km. 

Ya ini u MLA da pyntip u hawa e yei klam kam u kongsan ha i wai yaka thaw uiñke suwari ka Mawdngong Park ka chnong Mawlyndiar ynnin ka 2 tarik. “Kani ka surok daw pyndooh ko ya i eh kiwa chong chnong ka thaaiñ chem ki nadooh ka lai ka wan, i kit i bah wa kiwi kiwi de”, da ong u.

Advertisement ad1

Ka chnong Sohkynduh toh ka chnong ha ki thaaiñ Khatar-Shnong ka Hima Sohra hapoh ka Sohra Constituency wei yow poi cha kani ka chnong hap wow lai cha ka tidiang na ka chnong Laitryngew yow poi cha Laitmawsiang wa Mawlyndiar. Kani ka chnong da slem angnood ko wow yoh noh yaka sarok da boon snem wei kani ka khubor na u MLA da pynkmen ko chiboon ya ki paidbah.

Hawa klam won ya i wai yaka Park, kawa da pynlut na ka Scheme MGNREGA wa pynkreh da ka Mawlyndiar VEC, da ong u, “I da yoo i ya i ku ha ka liang ka kaam uiñ suwari katwa dang mih ki sngi ki snem wei ini i wai yong phi ya kani ka Park daw kyntu ko yaka pynmih piosa ka chnong wa i e kaam e jaam ya ki khon khynroo khyllood na ka thaaiñ hi”.

“Ini man ko ka nongmuna kawa bha tam wa ka chnong da pynyoo ko cha ka pyrthai. Ka thaaiñ Sohra ka da em chwa ko yaka rymaw wa miat wei emkaam i wow leh wow sumaar ya ki thaw ki bhaw yow yoh yaka yoh ka kot yow ku ko leh ha i jooh i por,” da ong u.

Kiwi de kiwa da ya emlang ha kani ka sngi kynthup ki ya u Sordar ka chnong Mawlyndiar, u Pyndapbor Tham, u Secretary u Kwental Tham, ki waheh wa kynthup ya kiwa kitkaam ka Mawlyndiar VEC, ki khynnah skur kiwa da e yei rwai pdiang burom na ka RCLP SSA School Mawlyndiar wa naka Church of God UP School, kiwa sikai, ki manbei manpa wa kiwi kiwi.

Neiliang ka chnong da e ko leh yaka dorkhat ha u MLA wow yarap lang wa kani ka thaw uiñke suwari u em ko haka Tourism Map yow kyntu ya ka yoh ka kot wa ki laad yoh kaam yoh jaam wei wow yarap pynyoh Scheme neibynta ki luti lai kjat, ki paikhana, ka um wa kiwi kiwi.

Ha kani ka Park em leh ka Kchaaid Umlwai, ki moo ha i dur i khlieh khon masi, ñianglartham, ka khroh wei ye leh u chynna ya ka thaaiñ Khatar Shnong.

Advertisement ad1

0 Comments

Leave a Reply