U Montri Rangbahdooh ka ri, u Narendra Modi da wai u ya 9 tylli ki Medical College ha Siddharth Nagar, UP. Kini ki 9 tylli ki Medical College toh kiwa em ha ki District ka Siddharthnagar, Etah, Hardoi, Pratapgarh, Fatehpur, Deoria, Ghazipur, Mirzapur wa Jaunpur.
Hawa e yei klam, u Modi da ong u ini toh i kreh chitom ka sorkar pyrdi deilang waka sorkar ka Uttar Pradesh wei deiwa kreh chitom kiwa boon ki Karma Yogi. Da ong u wa ka Siddharthnagar da e ko chiboon ki bru wa chakri paidbah nadooh u (L) Madhav Prasad Tripathi uwa da kreh chitom wow yarap tei ya ka ri. Da ong u leh wa ka Medical College ha Siddharthnagar toh kawa da e pyrtuid yow sahkynmoo ya u Madhav Babu wei i pyrtuid u toh i wow e mynsien ya kiwi wow chakri paidbah ki khamtam ki Doctor wa dang mih thymme na kani ka College.
U Modi da ong u wa deiwa wai kini ki 9 tylli ki College wa thymme da mih leh ar hajar piah tylli ki thaw thiah sumaar, da mih leh ki kreh thymme ya 5000 tylli neibynta ki Doctor waki Paramedic.
U Modi da ong u wa i dur ka Purvanchal da sih i neidaw ka sorkar warim heiwa da em i yap ki bru na ka Meningitis. Kani ka jooh ka Purvanchal, ka jooh ka Uttar Pradesh daw ye ko u chbæh thymme ha ka sumaar sukhær kani ka thaaiñ kattu.
Chooh chooh u Modi da ong u wa ym jooh em wai katni tylli ki Medical College hapoh ka jylla wei iwi don i daw toh wa em i mon ha ka synchaar khadar. Da ong u leh wa ka sorkar warim ha Delhi 7 snem nachwa wa ka sorkar Uttar Pradesh 4 snem nachwa, da kreh ki du wow yoh Vote donhi wei da hun ki du wow wai Dispensary wa ki Hospital wa khian yow yoh Vote. Da kdaw u leh wa lada chna ya ka yung, ki tiar ki tar wym ym biang, lada biang ki tiar, ki Doctor won wym em wa kiwi de ki bru wa emkaam wei da ini da chah baam-tooh ka poisa ki paidbah kiwa toh u yoh myntoi kiwa dooh wa duk.
U Modi da ong u leh wa ha u 2014, ki Medical Seat wa em hapoh ka ri toh hapoh 90,000 tylli. Ha ki 7 snem wa da lai da em 60,000 tylli ki thymme ki Medical Seat kiwa da pynmih hapoh ka ri. Hapoh Uttar Pradesh leh, hadooh u 2017 da em du 1900 tylli ki Medical Seat ha ki Medical College tangwa ha kini ki 4 snem da pynmih sa 1900 tylli.
