Jowai: U MLA ka Nartiang Constituency u Sniawbhalang Dhar da wan pyllait paidbah u ya kawi ka kari kit wa kjut (Ambulance) wei heijooh i por ya u sarok chnong (Internal Road) uwa jrong kamwa 4 Kilometer uwa chongdor hadooh kumba T. 2 Klur.
Ya ini da leh ha kani ka 7 tarik ha chnong Mupliang, West Jaiñtia Hills District.
U S. Dhar hawa klam u ha katai ka sngi da ong u wa kani chnong toh kawa embhah bha wow yoh ya uni u sarok chnong uwa jrong hadooh 4 KM neibhah ym em kiwi ki chnong hapoh ka Constituency yong oo kiwa yoh hadooh katni neibhah boon yoh ki kiwa jrong hapoh 4 KM donhi.
Da kyntu u ya ki paidbah wow chim ki ya uni u sarok wa man u u yong ki ymtoh yong ka sorkar hadien wa dep chna wei wow sumaar bha ya oo, ymtoh wow pynhaap moo, pynhaap chyiap, pynhaap dieñ næ wow pynyieñ kari ha ki dooid uni u sarok neibhah ini waroh daw pynsih ko ya u sarok.
Hei yatoh won wa ka kari Ambulance, u MLA da ong u wa ha kani ka chnong da yoo u wa ki bru toh kiwa duna i yoh wei dang duna kari leh wei heipor wa kjut wa chitom chem chitom bha ki. Deiwa em kani ka Ambulance daw yoh yarap bha ki wei emkaam u syndong bha ki ya kani ka kari ym toh u pynemkaam ka wow lai yaw wa kiwi kiwi.
U S. Kyndiah EE PWD Jowai Central da ong u wa ha kani ka tayaw hi u sdang noh u kreh ya uni u sarok wei neiliang yong oo leh da kyntu u wow syndong ya uni u sarok hadien wa dep chna ya oo wei wymhoi u chah ya ki truck wa kit mar u pynemkaam ki oo neibhah manda sih u sarok pyn ki paidbah hi wow chem chitom.
Discussion about this post