Ka Iawmuksow wa em ha chnong Mowkaiaw, West Jaiñtia Hills District toh ka yaaw wa da rim bha kawa da sdang nadooh u snem 1957, wei kat nang lai ki por da nangheh nangkrai ko wei kamwa man kattæ da em ko 370 tylli ki dukan wa kynthup nadooh ki dukan dai marbaam, dai that dai sula, ki dukan dai tiar wa kiwi de ki mar wa boonjait.
Hei lai luti kani ka yaaw, ynne ka sngi da man i wow sah kynmoo neibhah ka Dorbar Iawmuksow da ye ko u wai ya ki dukan dai doh wa da chna kyrpang hei dur wa khooid wa pliah lyngba ka mang poisa wa Rs. 9,60,000.
Na kani ka mang poisa wa Rs. 9,60,000 da yoh yarap ki Rs. 7,00,000 na u Vincent H Pala MP Lok Sabha lyngba ka Members of Parliament Local Area Development Scheme (MPLADS), Rs. 2,60,000 won da pyndap da ka Dorbar Iawmuksow.
Ya kini ki dukan dai doh da wan wow wai da u Vincent H Pala hi, hei emlang u MDC ka thaaiñ, u Winning G Sungoh, u BDO ka Laskeiñ Block, u B. Niang, ki dkhot ka Dorbar Iawmuksow, kiwa chah khut sñiawbha wa kiwi.
U Vincent H Pala hawa klam kyntu u ya kiwa dai wa kiwa thied wow pynneh yei khooid i pliah ka thaw dai doh kamjooh ka yaaw hi waroh kawi, khnang yow hun mynsien ki paidbah u baam ya ki marbaam kamjooh ki doh wa thied na kani ka yaaw.
Hawa yaroh ya ki bor pait bor pynlai kani ka yaaw, ong u wa hei lai luti yong O kylleiñ kylleiñ yoo u wa ki bru manda yoh poisa manda yoh Scheme jooh yaknieh ya tia ki, tangwa ha kani ka yaaw won yoo u yei phær i rukom pynlai, itæ toh najrong wa ye ki u pynlai hei rukom wa khooid wa pliah kawa man leh ka yaaw wa da jooh e yarap wot cha ki skur, ki Balang wa kiwi.
Kamtæ ngait skem u wow pteiñ chooh ki yei kaam wa bha, wei wot neiliang kiwa mihkhmat paidbah leh hawa yoo ki yei lai chakhmat i kaam wei biang i rukom pynlai ong u rap chlur chooh ki u e yarap.
U Winning G Sungoh hawa klam da ban joor u hajrong i emkaam u pynneh yei khooid i jngiar ka yaaw khamtam hei thaw dai doh, ong u leh da emkaam wow pyrkhat yaka thaw noh jhep wa biang wa paka, wei i por da toh ya ki chnong wa marjan u yakrehlang ki neibynta ini khnang yow lait u mih iwon iwon i arwi awra hadien habood deiwa e nongmuna yaka Iawmusiang ha Jowai.
Heiyatoh i dawa pynyoh kari kit jhep ha kani ka yaaw, u Winning G Sungoh da kular u wow e tangwa emkaam u yoh chwa yaka thaw noh jhep.
Neiliang u BDO ka Laskeiñ Block, u B. Niang hawa klam da e yumut u yaki bor pynlai yaaw kamjooh ki bor chnong wow ya krehlang ki waka sorkar neibynta ka thaw noh jhep, kamjooh leh neibynta u pynbha pynmiat yaka yaaw lyngba ka Scheme 100 sngi katkam wa chah ka luti ka aiñ.
Haka yalang wa pynlai da u Chairman ka Iawmuksow Mowkaiaw, u P.Shadap, u Secretary u Pynbiangmi Laloo da khana u yaka parom tbian ka yaaw, wei da yoh leh i klam na u waheh chnong ka Mowkaiaw, u Shaniah Lamare.
Discussion about this post