15 49.0138 8.38624 1 0 4000 1 https://wyrta.com 300 0
Advertisement ad1

Wai u Wailadmiki Shylla ya ka yung ri khniang wa T. 4 Lak ha Sohmynting

0 Comments

Jowai: U MLA ka 2 – Jowai Constituency, u Wailadmiki Shylla ynne ka sngi da wai paidbah u ya ka yung ri khniang wa em ha chnong Sohmynting, West Jaiñtia Hills Districthei hei emlang u Dr.C.Z Rynthlei, R.E.C Shillong, Central Silk Board, ka L. Dkhar ex-Joint Director Sericulture, Shillong, ka B. Lyngdoh, Joint Director Sericulture Shillong, wa kiwi kiwi ki sahep ka tnat Sericulture ki waheh ka chnong Sohmynting wa ki paaid warep, haka yalang wa da pynlai da ka A. Passah, District Sericulture Officer West Jaiñtia Hills District.

Kani ka yung ri khniang toh yong ka Plis Tariang wei da chna ya ka hapoh ka scheme yong ka tnat Sericulture wa tip kam ka IBSDP 2016-2017 hei lut kamwa T. 4 lak. Ya kani ka yung kamwa da e pyrtuid Chowki Rearing Centre mut ko ka thaw wow ri du ya ki khniang wa dang khian donhi. Ki khñiang em ki 5 kyrdan wow ri ya ki, ha kani ka Rearing Center toh u ri du ka kyrdan wa nyngkong waka kyrdan wa ar neitæ won haap kyrriah cha ki thaw ri khniang wa paka.

Ha rood kani ka yung ri khniang em leh i thaw wa heh kamwa 2 Acre heiwa da thung ya ki dieñ kiwa man i baam yong ki khniang.

U Dr.C.Z Rynthlei da ong u wa hapoh kani ka IBSDP scheme katkam ka project ha ka chi batch haap ri kamwa 5 hajar wei ha ka chisnem katkam ka thong yong ka IBSDP man kawi pa kawi ka Chowki Rearing Center toh u ye ko u pynmih hadooh 25 hajar tylli ki khniang wei wow saam won cha ki 100 ngut kiwa ri khniang, tæ kamwa ka chnong Sohmynting da em hi ko 100 ngut kiwa ri khniang ong u sñiaw yahaap bha wow em kani ka thaw ri khniang kamjooh i pynman ya ka pynsniawthooh paidbah.

Neitæ won yooluti u wa ka jylla u nang ku ko hadooh wow ye biang ko u saam symbe cha kiwi won ki jylla.

Neiliang ka L. Dkhar ex-Joint Director, Sericulture Shillong, booh ko i kyntu ya ki warep wow thung ki chiboon chiboon ki dieñ kamjooh u ri chiboon ki khniang yow yohnong chiboon, neibhah lada wyrchaw kiwa ri kajak wa kiwa chiboon, i por u wow lut man ko kamjooh hi katwa i pynmih won yaphær katwa kamtæ toh u ri chiboon yow yohnong.

Seiwi leh ong ko wa toh u thung leh ki jait jhoor ki wym emkaam u e dawai ha madan wa lait cha ki thied ki dieñ khnang yow yoh sboh ki dieñ wa thung.

Ka B. Lyngdoh, Joint Director Sericulture da khana ko wa da jied ya ka ri-loom Jaiñtia neidaw wa yoo toh i thaw wa sbooh wei ki bru leh boon kiwa ri khniang nalor wa chimkhia ki yei kaam yong ki.

Neiliang u kongsan, u Wailadmiki da ong u ka kaam ri khniang kaam rep kaam riang man ko ka wi ka laad wow yarap e khih e kreh khamtam hadien wada khang tih marpoh khyndaw, wei neiliang ka sorkar dang thooh laad ko kammon u sdang biang yei tih marpoh khyndaw leh, kam ki paidbah toh u sñiawthooh i wa ki marpoh khyndaw ym yoh i chi rta wei ye u lut u dooh heiwon iwon i por kamtæ emkaam u thooh kiwi tawon ki laad yow dap u kot ka yung ka sem deiwa kyruiñ chei rep i riang.

Da kyntu u ya ki paidbah wa hawa leh iwon iwon toh u man kiwa ngam yillu wei kreh chitom khnang wa ki bru na kylleiñ u thooh ki ki lyngba i kaam wa leh i.

Heijooh i por da kyntu u wow ya krehlang wa ki tnat sorkar waphær waphær khnang wa iwon iwon i thmu ka sorkar u man i iwa jop wei iwa e myntoi ya ki paidbah.

Advertisement ad1

0 Comments

Leave a Reply