Ka skur Ches’ Stars Higher Secondary School Jowai kawa da seiñ ha u snem 1991 ha kani ka kynti da yoh ko yaka School Auditorium kawa da wan wai ynne ka sngi da u MLA ka Jowai, u Wailadmiki Shylla, chirup i emlang u B.S. Sohliya, Deputy Commissioner West Jaiñtia Hills District wa ka A.P. Syiem, DSEO West Jaiñtia Hills.
Ya kani ka School Auditorium da e naam hei pyrtuid u (L) J. Jones Syngkon waka (L) Sibyl Rease Chullai kiwa man ki tre yung kamjooh leh kiwa seiñ ya ka skur wa lyngba i yah luti i kyrkhu yong ki ka skur man ko kamwa man katni.
Haka yalang wa pynlai da u R. Shullai waka K. Rapthap, neiliang u S. Laloo, President yong ka skur da e u i klam pdiang burom wei khana u leh yei lai luti kani ka skur nadooh wa sdang hadooh ynne ka sngi.
Ka DSEO hawa e yei klam da e yaroh ko ya waroh kiwa embynta u ya kyntu kynrong ya kani ka skur wa kynthup nadooh ki bor wa pait, bor pynlai yong ka, kiwa sikai, ki khynnah skur, ki wakreh wa kiwi.
Da kyntu ko leh ya kiwa sikai wa najrong wow e yei sikai wa paka emkaam leh u pait bniah yei rukom man ki khynnah neibhah wa ki man kiwa jan tam cha ki khynnah najrong wa ye ki u leh i bynta wa emkaam tam.
U Deputy Commissioner, B.S. Sohliya yooluti u wa kani ka skur u nang ku chooh chooh ko chaphrang heiyatoh u pynwandur yei stat i tip ki khynnah, wei kam ka skur kawa da lai luti dei bor yong ka hi ngait u wow man haroh ko kam ka nongmuna ya kiwi tawon.
Najrong wa ye u chna ya kani ka Auditorium ngait u wa haki kamra skur wa e sikai yaki khynnah leh kiwa sikai u ye chooh chooh ki u e i sikai wa rap biang.
Neiliang u Wailadmiki won da ong u, i puræ puthi ha kini ki sngi da emkaam u pynku ya ki khynnah haki liang waroh deiwa emkaam ki Smart Classroom, Auditorium, ki madan yalehke wa kiwi, kamtæ i yoh kani skur Ches’ Stars ya kani ka Auditorium man iwa biang tam.
Da yaroh u leh ya kani ka skur hajrong i pyrchang ko u lai luti katkam wa yah i por.
Hajrong ka dorkhat wa kani ka skur da e kti ko ha u MLA neibynta i dawa pynyoh Smart Class, ki kor Computer wa kiwi, neiliang yong oo paan u i yakrehlang yong ki, wei ong u leh wa ka Jowai toh ka thaw wa boon bha ki thaw puræ katda kamtæ ymtoh iwa suk ya oo wow leh syndon ya iwon iwon i dawa ki thaw puræ waphær waphær, kamtæ kyntu u wow man kiwa yai chah.
Da pynchongchit ya kani ka sngi dei rwai i chaad naki khynnah kamjooh ka Musical Play.
