U Wailadmiki Shylla, MLA ka 2-Jowai Constituency ha ka 22 tarik uni u bnai da wai paidbah u yaka Gallery namo ka thaw chong paitke ha madan Mooknor Sohmynting Dongwah, kawa da chna lyngba ka mang poisa wa T. 15 lak tam naka State Sport Council yong ka sorkar jylla deiwa emlang u MDC ka thaaiñ, u Lakhon Dkhar, u District Sports Officer, u K. Passah, u Dolloi ka Elaka Amwi, u J. Pyrtuh, u R. Challam, SDO PHE (Electrical), kiwa chah khut sñiawbha wa kiwi.
Ha kani ka sngi u Wailadmiki da saam u leh ya ki Work Order kamjooh ka song yarap poisa cha ki dong waphær, ki seiñ ñiam, kamjooh ka Sport Club, kiwa kynthup T. 2 lak yaka dong Iawpynsiñ, T. 2 lak yaka Dong Neiñ, T. 2 lak yaka Dong Dien, T. 2 lak yaka Balang Khliehmynsaid Presbyterian Sohmynting, T. 3 lak yaka Presbyterian English School wa T. 50,000 yaka Youth & Culture Sport Club Sohmynting.
Hawa klam u Wailadmiki, ong u wa chwa ini leh da dep yarap u T. 5 lak neibynta u pynbha pynmiat yaka Dorbar Hall, T. 50,000 yaka Sports Club, yaka Balang Catholic yow chna yungmane, i chna yaka yungskur Govt L.P. School, da dep yarap u yaka Dongwah wa kiwi de najrong ki Scheme yong samen. Da kular u leh wow booh Sub-Division PHE ha Sohmynting, kawa ye u pynyoh khih yoh kreh ya ki khon ka chnong, wei yow leh yeini namo ka Proposal da dep phah.
Najrong wa pynsñiaw u ya kiwi ki kaam pynroi wada wanrah u, ong haroh u i daw wym biang ki sarok luti syngkieñ haki snem nachwa da pynsahdien ko yaka chnong Sohmynting heiwa kat iwa mut wa mang ki paidbah leh du neidaw wa sih sarok boon kiwa swe tangwa kattu neini chakhmat ka chnong Sohmynting daw ku ko haki liang waroh wei da ye ko u khriñ ya ki bru na baar hawa pynlai ya kiwon kiwon ki Tournament.
U K. Passah da kyntu u wow yakrehlang waka Sport Club yow ye ko u ku neipor cheipor, wei kyntu u leh ya ki bei ki pa u e laad ya ki khon ki kti u embynta ki hei lehke Sport waphær waphær, neibhah da man ko leh kawa e jakpoh ha kini ki sngi.
Kiwi wa e i klam kynthup ki ya u Lakhon Dkhar, u O. Kya, Chairman Dongwah Sohmynting, u Dolloi ka Elaka Amwi wa kiwi haka yalang wa pynlai da u Waheh Chnong u B. Phawa.
Ha kani ka sngi neiliang ka Youth & Culture Sport Club Sohmynting da e haroh ko ka dorkhat ha kti u MLA yow pynyoh yei emkaam yong ki wa kynthup kawi ka Generator, kawi ka Amplifier, u Microphone deilang wa 2 tylli ki Stand, ki Speaker wa 3 tylli ki Stand waki Street Light (Halogen) 10 tylli.
