Shangpung: U montri ka PWD Building uwa man leh u MLA ka Shangpung, u Comingone Ymbon, ynne ka sngi da wai u ya u moo yurim wow chna ya ka yungskur Lummuroo Secondary School ha Shangpung Pohshnong.
I chna ya kani ka yungksur toh kawa yoh yarap poisa T. 1.82 Klur naka Asian Development Bank (ADB) hapoh ka “Supporting Human Capital Development in Meghalaya” project.
U Ymbon da e khublei u ya ka Lummuroo Secondary School, ka skur hapoh Shangpung kawa da chakri la 29 snem kamjooh ya ka SMC ka skur wa ki paidbah ka Shangpung ha kani ka kynti kiwa da yoh myntoi nei kreh chitom ki.
U montri da ong u leh wa ya kani ka kaam wa toh u pyndep hapoh chi snem wei emkaam wow kreh chitom wow pyndep ya ka hapoh i por.
Da kyntu u leh ya ki sahep wa pait ya ini i kaam wym hoi u e laad wow chna tang dep wei toh u man ko ka rukom chna wa paka.
Da ong u leh wa neidaw wym biang ki thaw puræ da yah ko ya ki bru wow mih ki na ki chnong yong ki wow lai cha sor yow yoh yei puræ puthi wa biang wei yow pyndooh yeini emkaam wow pynbiang ya ki thaw puræ puthi ha ki jar jiar ki chnong.
Da pynchlur u leh ya ki khynnah wa puræ wow bood ki yeiwa angnood mynsien ki wei wow kreh chitom yow poi cha ka thong yow man ki ki bru wa khroo.
Ha kani ka sngi da em leh u MDC ka thaaiñ u K.M Lyttan, ki Engineer, Principal ka skur, kiwa sikai wa ki waheh chnong.
Kani ka skur toh kawa sdang ha u snem 1989 wei katni da em ko 544 ki khynnah wa puræ ha ka.
Discussion about this post