Ka lympung yalehke Badminton yong kiwa da heh rta wa tip kam ka 2nd Open to All Veteran Badminton Tournament 2026, wa pynman da ka West Jaintia District Badminton Association dapoi ko cha wakut ha ka 12 tarik uni u bnai ha Indoor Hall ka Seiñraij Jowai wa em ha Tpep Pale, heiwa u Montri ka chnat Sports & Youth Affairs ka sorkar jylla, u Wailadmiki Shylla da wan pynhaap pyrda u ya kani ka lympung yalehke.
Hawa e yaroh ya ki bor pait pynlai kamjooh kiwa chimbynta, u Montri da ong u wa kam kani ka rynsan man ko kawa emkaam tam hei wow lehkmen ya i lehke Sports, wei chibynta leh u burom ya kiwa yalehke Badminton warim, najrong wow e mynsien ya ki khon khynroo khyllood.
Pynsñiaw u leh i sñiawngooh wa khroo hajrong i wan chimbynta kiwa yalehke warim kiwa da heh rta kiwa na ki District waphær ka jylla wa ki jylla wa marjan, deiwa ong wa i ya chimbynta yong ki wot hawa da heh rta man i sneiñ i e mynsien wa khroo hadooh kattæ kattæ.
Da pynkynmoo u yei kyntien wa ong “I rta toh i number donhi, tangwa i pliah man ko ka bor, wei kiwa heh rta man ki kiwa chongngiah chipor donhi.”
Ong haroh u wa kini kiwa yalehke da pynyoo sakhiat ki yei kordor deiwa pteiñ u maya wei chimbynta ha kani ka yalehke.
Da kyntu u ya ki khynroo khyllood wow bood ya ka nongmuna kini kiwa yalehke warim, najrong wa pynche u yei emkaam ka Sports heiyatoh wa i chait i khiah.
Kamwa ka jylla Meghalaya da pynkhreh ko u pynman ya ka 39th National Games, u Wailadmiki da kyntu u ya ki khynroo khyllood yalehke u pynemkaam bha ki ya kani ka laad wei wow kreh chitom yow khynjoh cha ki thong wa hakhlieh tam ha ki kaam Sports.
U Montri da kdaw u leh yei emkaam u pynmiat pynbha ya ki thaw yalehke wa da em chwa hapoh ka jylla nadooh ki Indoor Sports, wei neibynta ini dadep yaklam wa ka State Sports Council heiwa da yoh mynjur leh yeini i tyrwa.
Hawa kyruiñ won cha i yalehke ha kani ka sngi pynkut kawa man leh ka yakhun Final, ha ka Men’s Doubles 75 + Category da jop u Ready Sutnga wa u Anjan Buragohain deiwa pynrem ya u Deva Lalung Bordoloi wa u Deepak Thapa.
Ha ka Men’s Doubles 85 + Category da jop u Rimilan Passah wa u Dauru Laloo deiwa pynrem ya u Dr. Peterson Lamare wa u Kyrmenshisha Shylla.
Yei naam jop ha ka Men’s Doubles 95 + Category da rah u Abhijit Bhuyan wa u Goldenstar Kharbuli deiwa pynrem ya u Marbiangki Bareh wa u Rimilan Passah.
Ha ka Men’s Doubles 105 + Category da jop u Bastab Neog wa u Bijoy Barman deiwa pynrem ya u Goldenstar Kharbuli wa u Abhijit Bhuyan.
Ha ka Mixed Doubles 75 + Category da jop u Goldenstar Kharbuli wa ka Pretty Singh deiwa pynrem ya u Ram Najiar wa ka Dorothy Christie Challam.
Hadien wa kut ka yalehke da saam ya ki khusnaam hei emlang ki dkhot ka West Jaintia District Badminton Association wa kynthup ya u President, u Dawanroi Pyrbot, u General Secretary, u Rimilan Passah, u Adviser, u James Pohsngap, u Chairman Tournament Committee, u Patrick Lamare, u Secretary Tournament Committee, u Nangebormi Suting wa kiwi kiwi.
Discussion about this post