Haka “5th State Conference” yong ka seiñ kiwa sikai hapoh ka lama Meghalaya Upper Primary Teachers Association (MUPSTA) kawa da pynman ynne ka sngi ha Ummulong, West Jaiñtia Hills District, kani ka seiñ kiwa sikai da dawa ko leh naka sorkar jylla lyngba u Montri ka chnat puræ puthi u Rakkam A Sangma uwa da wan sakhi kam u kongsan, wa toh u pynpsiah Deficit noh ya 844 tylli ki Adhoc Upper Primary School hapoh ka jylla yeiwa da dep tyrwa nadooh i por yong ka sorkar MDA-I lyngba ka Office Order wa da pynmih haka 07-01-19.
Kamjooh leh da dawa wow pynku yaka tulop yong ki, wow pynyoh ki Grant waphær waphær, wow pynyinsur yei rta wa yoh u kreh, najrong wa pynsñiaw ki yei eh i khoo heiyatoh i pynkhrehkaam salonsar yaka MTET haki skur Adhoc.
Neiliang u Montri hawa e yei klam ong u, neidaw wa haka chnat puræ puthi yong ka jylla em boon jait ki chnat wei kiwa sikai leh em kiwa sikai Adhoc, Deficit, Non-Government, Goverment wa kiwi, kamtæ khnang yow ye u wanrah i chakri wa lait nei kynrum kynram, ka sorkar dadep thung ko daka State Education Commission neibynta u thooh bniah heiyatoh i puræ puthi hapoh ka jylla.
Wei iwa mih na iwa chem ka State Education Commission daw phah cha ka sorkar neibynta u pait yow pyrkhat chwa u chim yaka rai wa biang tam heiyatoh u pynbha pynmiat yei puræ puthi.
Kamtæ heiyatoh wei dawa kani ka seiñ kiwa sikai ong u wa sñiawthooh hi u yei eh i khoo yong ki kam kiwa sikai tangwa ya kattæ hi ym pu ye u wow kular iyi iyi neidaw waka sorkar dang yang ko u yoh i e yumut naka State Education Commission.
“Nga sñiawthooh hi O yei bahkhlieh yong nga wei u leh O iwa bha tam neibynta i bha i miat kiwa sikai kamjooh ka puræ puthi,” ong u Rakkam.
Heijooh i por da ban joor haroh u ya kiwa sikai wow em ki i bahkhlieh yei kaam wa kreh ki khnang waka mynried ki khynnah u tyrchaaiñ ko.
Najrong i klam u Montri, da yoh leh i klam na u H.M.Shangpliang, Adviser ka chnat puræ puthi ka sorkar, naka Santa Mary Shylla, MLA Sutnga Saipung, na u Brightstar Chyrmang, MDC Jowai North wa kiwi.
Discussion about this post