Wan du uwi u MLA ka Congress wow pynche ya ka khubor wa daw yut noh cha ka NPP

Ka khubor yut seiñ noh ki 3 ngut ki MLA Congress da thai bha ko wei ini da pynman ko ya ka Meghalaya Pradesh Congress Committee (MPCC) wow paan pynche ynne ka sngi na ki MLA.

Hawa klam hadien ka yalang, u President ka MPCC, u Vincent H Pala da khana u wa napyrdi ki 3 ngut ki MLA kiwa mut wow yut na ka Congress yow lai psiah cha ka NPP, du u MLA ka Umsning, u Dr. Celestine Lyngdoh uwa da poi cha ka yalang, wei neiliang yong oo da pynsñiaw u wa kamwa man kattæ ki MLA ym em thmu ki wow lai cheiwon cheiwon leh.

Katkam wa khana u Vincent Pala, da ong u wa u Dr. Celestine da pyntip u wa hadooh kattæ dang pyrkhat donhi tangwa ym em chim rai neibhah ka NPP kawa yahkhmat ya ka sorkar ha ka jylla da tyrwa ko chiboon ki kaam pynroi lada ki MLA psiah ki cha ka NPP.

Ka Congress kattæ em ko 4 ngut ki MLA ha ka jylla hadien ka Election MP kawa dadep heiwa u Saleng Sangma uwa man u MLA ka Congress na Garo Hills da ieh noh u yei kaam MLA hadien wa chah jied u kam u MP ka Tura.