Ynne ka sngi da man ko ka sngi wow sah khana parom ya ki paidbah ka thaaiñ Laskeiñ heiwa kawi na ki skur wa da e chakri ya ki paidbah na ki chnong ka thaaiñ, ka Sawlyngdoh Higher Secondary School, Mowkaiaw da lehkmen ko yei dap 50 snem namo ka Golden Jubilee.
Ya kani ka sngi lehkmen da wan sakhi da u Montri Rangbah ka jylla, u Conrad Sangma, hei emlang u Montri ka chnat puræ puthi, u Lahkmen Rymbui, u Montri ka chnat pynroi sor, u Sniawbhalang Dhar wa kiwi kiwi.
Ya ka yalang ynne da pynlai da u MLA ka Mowkaiaw uwa jooh man leh u khynnah warim kani ka skur, u Nujorki Sungoh heiwa da yoh ya ki kyntien pdiang burom na ka Principal ka skur, ka Violin Lyngdoh.
Ya kani ka skur da seiñ ha u 1971 hapoh i yahkhmat u (T) Thomlin Suchiang chirup wa ki waheh na Mukhap, Mowtyrchiah wa Laskein heiwa da khut ya ka kam ka Raliang Sawlyngdoh High School.
U Sniawbhalang Dhar hawa e yei klam da ong u wa i lehkmen wa yei dap 50 snem toh ka luti kawa eh wei kawa jngai. Da e khublei u ya kiwa seiñ ya kani ka skur khamtam ya u MLA warim ka thaaiñ u (T) Mihsalan Suchiang uwa da e yarap chiboon ya ka skur deiwa ong wa i chynna jngai yong ki toh iwa ymye de wow su kylliang.
Da ong u wa u hanla man ko ka sien wa nyngkong ya u Nurjorki wa man u kam u MLA tangwa da man u leh uwa kreh chitom bha neibynta ki paidbah.
U Lahkmen Rymbui da ong u wa i wan yong ki ynne toh wa em i sñiaw wa ka sorkar MDA toh ka sorkar kawa pyrkhat hei wow pynku ya ki kaam ha waroh ki liang heiwa ha u 2018 da em i artatien tangwa hapoh i yahkhmat u Conrad da em u ka thong wow kyntu ya i yoh i laa, i puræ puthi, ka um wa kiwi kiwi.
Da ong u wa ka sorkar hapoh ka Block wow pynjan ya ki chnong cha ki thaw puræ da tipmit ya ka Shangpung College hapoh ka People’s College Scheme khnang wow suk ki khynnah na kani ka Block wow yoh ya i stat i tip.
Heiyatoh wa ki kaam wa kreh ka sorkar, neiliang u Lahkmen da kyntu u ya i krehlang ki paidbah.
Kam u kongsan ha kani ka sngi u Conrad Sangma da pynkynmoo u ya ki kyntien u Nelson Mandela uwa da ong ‘I stat toh i bor wow wanrah ya i kylla’ wei hajrong ini ka sorkar leh chimkhia bha ko wow kyntu kynrong ya ini i kaam hapoh ka jylla.
Da ong u wa dap u dei kmen wow embynta ha kani ka lehkmen dap 50 snem ka skur wei jia ryngkat leh wa ka jylla daw dap ko 50 snem wei ini pynyoo i ya i chynna jngai yong kiwa sdang ya kani ka skur.
U Conrad da pynkynmoo u wa ha u 2018-19 heipor wa yalap Election da ban joor u hajrong i stat i tip wei da chem chitom bha u kreh hajrong kani ka bynta wei ka jylla pynlut ko palat T. 2000 klur chi snem ha i stat i tip hanla kattæ leh em i eh i khoo tangwa ha ki soo snem wa da lai da chynna da sakhi yeiwa kylla ini i bynta.
Da ong u wa ki kaam kiwa ymye wow leh ha ki 10-15 snem nachwa, kani ka sorkar da leh ko ya ki ha kini ki soo snem wa da lai wei dang em ki bynta wa duna kam ya kiwa sikai SSA heiwa ha kylleiñ ka ri boon ki jylla kiwa dooh tulop wei hapoh ka jylla ka sorkar jylla da yaleh ko wow thooh ki laad kammon wow pynbait yeini.
Ha kani ka sngi da e u leh ya ki kyntien sneiñ kyntu heiwa da ong u wa ka mynried yong phi chong ko heipor wa katni heiwa emkaam wow em ka thong wei wow kreh chitom neibynta ini nadooh katni.
Ya ka yalang ha kani ka sngi da pynkut ya ka da ki kyntien khublei na ka Vice Principal ka skur, ka B. Pator.
