Ynne ka sngi uwa yahkhmat ya ka liang pyrchah ha ka dorbar chna aiñ ka jylla, u Dr. Mukul Sangma chirup wa kiwi ki MLA ka Congress kiwa kynthup ya u M. Rapsang, u Zenith Sangma, wa u Shitlang Pale da wan hiar ki cha Jowai wow booddien ya i pynkhreh wow yakhun pyrchah ya ka khlam COVID-19.
Ha kani ka sngi da emlang leh u DHS(MI) u Dr. Aman Warr, u Deputy Commissioner ka District, u Garod LSN Dykes wa kiwi kiwi.
Nyngkong kini ki MLA da lai pait ki ya ka Corona Care Centre kawa em ha St. Aloysius Hospital, Ummulong, neitæ da hiar ki cha ki Community Isolation Centre ha Ladthadlaboh, neitæ ha Chilliangraij wa ya ka MCH Hospital ha Panaliar, Jowai kawa man kam ka COVID-19 Hospital.
Hadien ini hawa yaklam wa kiwa pathai khubor, u Dr. Mukul da ong u wa i daw wa wan ynne ka sngi toh hajrong ka yurim wow yoh yutip ya ki laad e sumaar ya kiwa chah ktah ha ka khlam COVID-19 ha kani ka la-ær wa ar heiwa kammon i man ki thaw sumaar ha waroh ki District, nadooh ki Oxygen, i em ki wakreh wa kiwi.
Da ong u wa hadein wa tip wa i kreh ya ka Oxygen Plant ha Jowai dang lai i chakhmat da kyrmen skem u wa ki bru ym emkaam de ki wow lai cha Shillong wow chah sumaar khamtam na West wa East Jaiñtia Hills.
Heijooh i por da ong u wa ka sorkar da toh u wanrah smat ko ya ki laad yarap cha ka chnat i chait i khiah neibhah wa uni u khñiang dang kylla u kat dang mih ki sngi chwa wow wan ka la-ær wa le (Third Wave) yong kani ka khlam.
U Dr. Mukul da ong u wa kamwa man kattæ da chna wei da pynjanai ya ki thaw sumaar tangwa iyi u myntoi ini waroh lada ym em won ki wakreh, da ban u hajrong ini deiwa pynrap wa lada em ki bru kiwa chah ktah ha kani ka khlam lada emkaam ki ya ki Ventilator tangwa ym em won ki bru kiwa pliah ha kini ki jait kaam kam ki Anaesthetist da man ko ka dooh nong ya ki paidbah.
Hajrong i thmu won ka sorkar u chna yaki thaw e sumaar, ong u wa hei sakhiat toh u pait wei pynbiang chwa yei duna haki thaw sumaar wada em chwa, najrong wa em leh ki thaw sumaar ki wym pu em pynkrehkam wot yaki laad e sumaar wada em chwa leh.
