15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Wan pyndem ki chi kurim kam ki dkhot ka HNLC

0 Comments
Advertisement ad1

Shillong: Ki ar ngut ki chi kurim kiwa man ki dkhot ka Hynñiewtrep National Liberation Council (HNLC) da wan pyndem ki hakhmat u montri ka kaam pohyung ka jylla, u James K Sangma ynne ka sngi hei emlang ki heh pulit ka jylla ha Headquarter ki pulit Shillong.

Kini ki ar ngut toh kiwa tip pyrtuid kam u Aiborlang Thongni (36 snem) uwa jooh khut sin leh kam u Bahbah Mawpud uwa na ka chnong Mawpud, South West Khasi Hills wa ka kurim yong oo kawa tip pyrtuid kam ka Rishalin Syiemlieh (27 snem) kawa jooh khut sin ka Lin na ka chnong Photjaud, South West Khasi Hills District. Kini waroh ar ngut da yoh sikai ki wow man kam ki bru kieñ suloi ha Chittagong, Bangladesh.

Advertisement ad1

Katkam wa pyntip kini ki chi kurim da psiah ki cha ka HNLC nadooh wa dang khian ki heiwa ka Rishalin da em ko hapoh ka seiñ la kamwa 13 snem wei da psiah ko dang heipor wa dang 14 snem ko katwa u Aiborlang won da psiah u snem 2001.

Hawa klam kini ki chi kurim, da ong ki wa i daw yong ki wow wanbiang cha ka imlang sahlang neidaw wa kwah ki ya ka mynried wa bha ya ki khon yong ki wa ym ye ki u e lada em ki ha ka seiñ.

Kini ki chi kurim da em ki ar ngut ki khon, uwi wa dang le snem tam wa iwi won iwa dang soo bnai wei waroh chikattu chong sah ki ha ka chnong Bilwa kawa em ha Bangladesh.

Da pyntip ki wa ha ki por wa em ki ha Bangladesh, u Aiborlang kreh u i kaam rep pathi katwa ka kurim yong oo won kreh ko ki kaam yung wei ym jooh em yoh laad ki wow embynta ha ki kaam ka seiñ HNLC.

Neiliang u montri da yaroh u ya kini ki ar ngut kiwa da chim ya kani ka rai wow wan biang cha ka luti wa toh wei da kular u leh wow e ya ka yarap kamwa da mang ka sorkar ya kiwa wan pyndem. Heijooh i por u James da ong u wa ka sorkar ym bien ko u yaklam yasuk wa kiwon kiwon ki seiñ kieñsuloi kiwa em ha ka jylla lada ym sangeh ki ya ki kaam pyrchah ya ka imlang sahlang wei toh u wan ki cha khmat wow pyndem hakhmat ka aiñ.

Share this:
Previous

Ki kaam pyrchah aiñ ha kylleiñ ka jylla

Next

Dooh uwi yei mynsien hadien wa ngam u ha Wah Myntang