Jowai: Hadien wa u Chemhok Garod, General Secretary warim ka Party UDP hapoh ka 3-Raliang LA Constituency da mih noh u naka Party deiwa lai psiah cha kawi won ka Party, neiliang ki bor pait bor pynlai ka Party yong ka ri-loom Jaiñtia hi waroh kawi, kam chi bynta wow pynkhlan chooh chooh ya ka Party, ha kani ka 22 tarik u Kmaichonglad da pynman ki yaka General Meeting kamjooh wow pynskem ya kiwa kitkaam thymme haka yalang wa pynlai da u Michael Saio ha chnong Nangbah West Jaiñtia Hills District.
Ha kani ka General Meeting da wan emlang u Dr. Jemino Mawthoh General Secretary wa pait yaka jylla waroh kawi, ki arngut ki MLA ka Party wa kynthup u Kyrmen Shylla, u Nujorki Sungoh, u Bison Iano MDC, u Kitboklang Nongtdu General Secretary Jaiñtia Hills, Kynsai Bareh President Youth Wing West Jaiñtia, u Kor Sympli, Finelyness Bareh President East Jaiñtia wa kiwi kiwi.
Kiwa kitkaam thymme ka 3 Raliang LA Constituency kynthup ya u Lakhon Biam kam u President, Bison Iano MDC kam u Vice President, Moonlight Daw kam u Secretary, Constantine Langstang Asst. Secretary, Konstan Sungoh kam u Advisor natlor kiwi won ki Executive Member.
Ya kini kiwa kitkaam da pynskem da u Dr. Jemino Mawthoh uwa da e leh yei kyntien kyntu kyrsu wow man ki kitæ kiwa kreh Party wa skem ka yurim wei wow kreh chitom neibynta i miat i bha i roi i par u paidbah kamjooh ka chnong ka thaw.
Neiliang kini ki heh ka Party hei klam yong ki ha kani ka sngi da ong ki wa i por da toh ya ki paidbah u kyruiñ næ jied yaka Party UDP lada angnood wow yoh yei roi i par, wei ong ki kamwa man katni leh ka UDP toh kawa ksoh chabi yaka sorkar hapoh ka jylla.
Neitæ em leh i kyrmen ha ki wa kamwa ka Party hi da sdang ko u ku, kamtæ hei yatoh waka MP Election leh yooluti ki wa toh ka Party UDP ka wow jop na ka Shillong Seat.
Discussion about this post