Ka District Hub for Empowerment of Women (DHEW) kawa em hapoh ka Social Welfare Department, West Jaiñtia Hills District deiwa ya krehlang wa ka Happy Red Rooster MMA, da pyndep ki yei e sikai wa 5 sngi kammon wow yada ki kynthai ya idæ neibynta kiwa lai puræ ha Kiang Nangbah Higher Secondary School wa em ha Mynthong, Jowai wa ka Dulong SSA Secondary School, Jowai.
Ya kani ka e sikai da pynman ha yungwalieh warim ka Dulong.
Waroh da em 42 ngut ki kynthai wa da yoh sikai iwa da leh da ki Certified Trained Masters ka Happy Red Rooster MMA.
Kani man ko kam chibyhnta ka thong wa tip kam ka 16 Days Campaign to End Gender Based Violence hapoh ka Beti Bachao Beti Padhao (BBBP) yow pynkupbor ya ki kynthai yow man ki kiwa sñiaw skem hei lai i wan.
Neiliang u G.H. Passah, MCS kam u kongsan hawa e yei klam da ong u wa ki kynthai nadooh ki khynnah da hap ki wow maad chiboon i eh i khoo hapoh ka imlang sahlang wei da emkaam wow em yei kitkhlieh yonglang yow pyndooh pyndam yei chah thombor ki kynthai dei wym toh u suki hi-eh yeini waroh tangwa deiwa pynsñiawthooh paidbah yow wan chakhmat lada jia.
Da ong u leh wa yow tip u yada ya idæ toh iwa emkaam yow sñiaw chngaaiñ ki kynthai.
U H. Saioo, Sub-Inspector, Jowai Traffic Branch da khana u leh kammon wow yada ya idæ katni ha kani ka juk Internet dei wym toh wow khana chaphang yong idæ cha ki bru wym tipmit khamtam ha ki rynsan Social Media.
U Isaiah Kharmawphlang uwa man kam uwa seiñ ya ka Happy Red Rooster, MMA da ong u wa kini ki e sikai ha kini ka tayaaw wa dadep toh kammon wow tip yeiwa emkaam yow yada ya idæ wei iwa emkaam toh wow pynpliah yeini deiwa pyrchang ki man-ka-sngi wei wow pynchlur kamjooh wow sikai ya kiwi.
Hachwa ini da yoh ya ki ktien pdiang burom na ka Y. Najiar, District Social Welfare Officer wei ya ka yalang da pynlai da u M. Bareh, waheh chnong ka Dulong katwa u FGN Rynga, District Mission Coordinator, DHEW Social Welfare, Jowai da e u ki kyntien khublei.
Discussion about this post