Wan thooh bniah ki seiñ niam ya ka poisa wa kular ka sorkar pyrdi wow pynbha pynmiat ya ki thaw mane blai

Shillong: Kiwa yahkhmat ki le tylli ki niam wa kynthup ya ka Seng Khasi Laitlyngkot, ka Balang Katholik na Mairang wa ka Balang Presbyterian na Nongsawlia, Sohra, ynne ka sngi da lai yachem ki ya u montri ka chnat Arts and Culture ka jylla uwa man leh u MLA ka BJP na Pynthorumkhrah, u Alexander Laloo Hek wow phah tuklar ha ka sorkar India hei yatoh waka poisa (scheme) wa da pynbna da ka sorkar pyrdi lyngba ka chnat uiñke ha chwa ka Election MLA 2018 ha ka jylla, lyngba ka Swadesh Darshan & Prasad Scheme kawa man kam chibynta wow pynmiat ya ki thaw mane blai wa ki thaw lehniam yow riñ ya kiwa uiñke suwari.

Hadien i yachem wa u montri, kiwa yahkhmat ka niam da ym bien ki wow yaklam wa kiwa thoh khubor tangwa u Secretary ka St. Thomas Mairang Parish, u Regaldus Iawphniaw da pyntip u wa i daw ka yachem wa u Hek toh wow thooh yuitp chaphang ka Scheme wa pynbna ka sorkar India kawa hadooh katni ym pu em yoh.

Neiliang u Hek won da ong u wa ka sorkar India da pynbna ko ya ka poisa wa T. 70 kular heiwa ka St.Thomas Mairang da pynsñiaw ko wa emkaam wow yoh ya ki kaamra wa heh yow ye ko u leh ya kiwa emkaam ha kiwa boon rukom.

“Da thooh yutip ki wa cheiwon wiar kani ka Scheme wei nga da yoh O u yaklam leh wa u Metbah Lyngdoh hajrong kani ka kaam tangwa ym pu em u yoh u yaklam wa u montri khynnah wa pait ya ka kaam uiñke suwari ka ri u KJ Alphons,” ong u Hek.

Related posts

Dam noh ka NPP wow kyrchaan ya ka sorkar ka Manipur wa yahkhmat da ka BJP

November 17, 2024

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

U Hek da pyntip u leh wa kiwa yahkhmat ka Balang Presbyterian na Nongsawalia da lai yachem ki wa oo yow ye u pynchna pynmiat ya ka yungmane kawa da rim tam ha ri Khasi kawa man leh kam ka wi na ki thaw wa taan bha ya kiwa uiñke suwari ha ka thaaiñ Sohra.

U Hek da pyntip u leh wa kiwa yahkhmat ka Seng Khasi na Laitlkyngkot da thooh yutip ki hajrong ka Scheme wow chna ya ka kamra wa heh wow leh ya ki niam ka rukom kamjooh wow chna kynroh ha Laitlyngkot.

Kam wow pynkynmoo wa ha chwa ka Election MLA ha ka jylla, ka sorkar BJP na Delhi da pynbna ko wow e yarap lyngba ka Swadesh Darshan & Prasad Scheme wow pynmiat ya ki thaw mane blai yow pynku ya ka kaam uiñke suwari.

Heijooh i por leh da em kiwa kyntait ya kani ka Scheme ka sorkar pyrdi, tangwa da yoo phylla won wa katni wa kiwa heh ki seiñ da kyntait ki katwa ki chnat won da lai ki wow thooh ya kani ka Scheme.