Yow em i yajan hapyrdi ka ri Bangladesh wa ka India, khamtam wa ka jylla Meghalaya wa em u pood wa jrong wa kani ka ri, ynne ka sngi neiliang u High Commissioner ka ri Bangladesh, u M. Imran da wan yachem u ya u symbood montri rangbah ka jylla, u Prestone Tynsong heiwa da yaklam hajrong ki kaam pynroi ha khappood wa khamtam wow pynboon ya ki yaw khappood namo ki Border Haat.
U Prestone Tynsong da ong u wa da yaklam yillu bha hajrong ki Border Haat, heiwa neiliang ka jylla da tyrwa ko ya ka sorkar pyrdi wow booh sa 11-12 tylli kini ki yaw khappood.
Da ong u leh u ini i wan u High Commissioner toh wa ka Bangladesh kwah ko wow em boon tylli ki Land Custom Station namo ki thaw khayi ha East Khasi Hills, neibhah wa ha Dawki ka thaw khayi da man ko kawa khynnia wei i em chooh chooh kini ki thaw khayi daw pynkhlan ko yei khayi pateiñ hapyrdi ka ri Bangladesh wa ka jylla Meghalaya.
Ha iwi i liang won u Prestone da pyntip u leh wa da yaklam hajrong i mih khubor yei chah kyrriah ya ki jaitbru Garo kiwa sah ha ka ri Bangladesh, heiwa neiliang u Imran da pyntip u wa ym em kam itæ wow ktah ya ki neibhah wa man ki ki bru kiwa sah pura ha ka ri Bangladesh, wei lada kyrriah ya ki na i thaw wa em ki katni, ka sorkar Bangladesh daw pynbiang ko ya i thaw sah wa paka ya ki.
Hajrong i kær naar-chieh ha khappood (Border Fencing), u Prestone u da pyntip u wa ym em u yaklam iwon iwon hajrong ini neibhah ini toh i kaam ka sorkar pyrdi.
Hawa yaklam won wa u Muhammed Imran, da ong u wa i yachem wa ka sorkar jylla toh neibynta i yakrehlang hapyrdi ki ar ri, khamtam wa ka jylla Meghalaya neibhah wa em ko u pood wa jrong wei mynstep u lai u cha ki thaw khappood yow pait ya ki laad neibynta wow wanrah ya ki kaam pynroi ha chi lynter.
