15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Wan uiñ biang ki 6 ngut ki MDC wow kyrchaan ya ka UDA ha KHADC

0 Comments

Shillong: Ki 6 ngut ki MDC ha KHADC kiwa da phah ya ka chithi wa da ya soi pyrtuid lang wow dam noh u kyrchaan ya ka Executive Committee ka United Democratic Alliance (UDA), da rai ki wow uiñ biang wow kyrchaan ya ka Executive Committee wa da yahkhmat da u Teinwell Dkhar kam u Chief Executive Member (CEM).

Hawa yaklam hadien wa wai ka yalang kawa da pynman ynne ka miet ha ka yung sah yong u National President ka National People’s Party (NPP) uwa man leh u Montri Rangbah, u Conrad K Sangma, neiliang u CEM da ong u wa ka yalang da ye ko wow pynbait noh ya waroh ki wym sñiawthooh yumut kiwa da mih ha kini ki sngi heiwa ki 6 ngut ki MDC kiwa da mih, da psiah biang ki wow pynneh ya ka Executive Committee ka UDA.

Advertisement ad1

“I da rai i wa neini chakhmat u krehlang noh kam ka wi deiwa mylliñ noh ya iwa da dep,” da ong u Teinwel.

Hawa jubab yeiwa kylli, u MDC khlem seiñ na Nongkrem, u Lambor Malngiang da ong u, “Ha ka yung kawa heh em ko i wym ya sñiawthooh, tangwa katni i waroh da wan biang i ha ka sñiawthooh yumut wei da chna leh ya ka Co-ordination Committee lada em iwon iwon i wym sñiawthooh yumut wa kynthup ya waroh ki liang kiwa em ha ka UDA, ka Regional Democratic Alliance (RDA) wa ka People’s Democratic Alliance (PDA) khnang wa i u ye i wow kreh deiwa sñiawthooh yumut deilang wa ka Executive Committee.”

Ya kani ka Co-ordination Committee u khlieh hi da u CEM kam u Chairman wei daw emlang MDC 4 ngut na ka RDA wa 4 ngut na ka PDA.

I sñiawthooh yumut hapyrdi ki MDC ka UDA toh hadien wa kiwa yahkhmat wa rangbah na ki Party wa em ha ka sorkar Meghalaya Democratic Alliance (MDA) da tuklar ki, wei ha chwa wow khut ya ka yalang yong ka UDA da em leh i yachem yong ki MDC ka PDA, kiwa kynthup na ka seiñ NPP, PDF wa ki MDC khlem seiñ deilang wa i emlang kiwa yahkhmat ka MDA, kitæ u Montri Rangbah, u Conrad K Sangma kamjooh wa u Symbood Montri Rangbah, u Prestone Tynsong.

Previous
Next

0 Comments

Leave a Reply