Jowai: U Montri ka chnat Agriculture u Banteidor Lyngdoh ynne ka sngi da wai u ya ka yaw ha Ialong kawa tip kam ka Ialong Lay-by Market kawa em harood u sarok bah National Highway 06 hei emlang u MLA ka thaaiñ u Wailadmiki Shylla, wei da man ko leh ka Lay-by Market wa nyngkong ha ri-loom Jaiñtia wei kawa le hapoh ka jylla.
Neiliang u Montri, da yaroh u yei chimkhia ka chnat Agriculture, ka Farmers Welfare, ka Directorate of Horticulture waka DRDA yow chna ya kani ka yaw kawa daw pynyoh myntoi ya ki paidbah kamjooh ya ki warep. Da ong u leh wa i booh ya kini ki jait yaw daw yarap ko ya ki warep wow pynku yei khih i khan yong ki. Da khut u leh ya ki warep wow wan yachem ya ki sahep sorkar lada emkaam ki ya iwon iwon i yarap. Da e khublei u leh yaka chnong Ialong kawa da e sñiawbha ya ini i thaw yow chna ya kani ka yaw.
Neiliang u Chairman Meghalaya Farmers (Empowerment) Commission, u K.N Kumar, IAS (Retired) hei klam wai phang yong oo da khana u ya ki myntoi wa ye u yoh deiwa em yaka yaw wa em harood ki sarok-bah iwa daw pynmyntoi ya ki warep ka thaaiñ kamjooh ya kiwa lai luti. Da khana u leh wa ya kani ka yaw da chna hei dor wa T. 71, 43,000 hapoh ka Special Central Assistance u 2014-2015, ha i thaw wa heh 3839.67 Sq.mt deiwa em 20 tylli ki thaw chong dai namo ki Stalls. U Chairman da kyrpaad u leh ya kiwa chong chnong wow e laad u chong dai deiwa booh jar jiar ka pali yow yoh laad waroh ki warep wow dai yei mar yong ki.
Kiwi kiwa klam toh u MLA ka thaaiñ u Wailadmiki Shylla wa u waheh chnong ka Ialong u B. Shylla.
Da emlang leh u Additional Deputy Commissioner u PK Boro, ka S. Nongbet, Director of Horticulture, Meghalaya, ka R.K. Blah, District Horticulture Officer, West Jaiñtia Hills, ki sahep, ki wakreh wa ki warep.