U Montri Rangbah ka jylla, u Conrad K. Sangma ynne da ong u wa em palat 70,000 ngut ki khynroo wa thooh kreh man-u-snem wei emkaam ya ka sorkar wow wanrah ya ka Policy ka wow ye u pdiang ya ki khnang wow ye ki u seiñ khih kamjooh wow yoh kreh.
Da ong u wa kiwa yaleh kreh em ki chiboon bha wei ym ye ka sorkar wow e kreh ya waroh. Neibhah kamwa 1500 ngut toh kiwa yoh kreh sorkar lyngba ka Meghalaya Public Service Commission (MPSC) wa ki District Selection Committees (DSC), kamtæ da emkaam wow pynsñiawthooh wa ye ki u seiñ kreh pyn daki hi yow pynku ya ka yaaw ka haat.
Yeini da ong u Conrad hawa wai paidbah ya ka CM Elevate ha Jowai hei emlang ki MLA, u Wailadmiki Shylla, ka Santa Mary Shylla, u Lahkmen Rymbui wa u CEM ka JHADC, u Thombor Shiwat.
U Conrad da ong u wa ka sorkar hapoh ka CM Elevate da booh thong ko wow pynchlur ya kiwa seiñ kreh deiwa yarap ya ki 20,000 ngut heiwa u pynlait hadooh Rs. 300 klur ha ki san snem wow wan.
Hapoh ka CM Elevate, kiwa seiñ kreh ye ki wow pyndap pyrtuid lada hei rep, ki kaam wa yatoh wa i uiñke suwari, ki kaam pynwyrngia wa kiwi kiwi heiwa hapoh kani ka Scheme daw e Subsidy hadooh 75% wei kawa sah won toh ka ram na ki Bank.
Chooh chooh da ong u wa ini daw ye u yaleh pyrchah yei dooh kreh ha ki 10-15 snem wow wan deiwa kdaw wa ka Scheme kam ka PRIME waka CM Elevate daw e sikai, wei u pynkupbor ya ki khynroo yow ye ki wow leh ya ki kaam wa mih soh mih sla.
Da pyntip u wa palat 33 lak ngut ki bru hapoh ka jylla na ki 39 lak toh kiwa hapoh 45 snem i rta, wei daw man iwa eh yow ye ki u yoh kreh. Katni em 70,000 ngut kiwa wan thooh kreh wei daw ku cha ka 1 lak ngut ha ki snem wow wan katwa kamtæ ka sorkar da sdang ko ya ka CM Elevate.
Heijooh i por da ong u wa lyngba ka CM Elevate, ka sorkar booh thong ko wow pynmih hadooh 50,000 tylli ki kreh.
Da pynkynmoo u wa hapoh ka Yess! Meghalaya kawa da sdang ha u 2022 da ye wow kyrchaan ya kiwa boon ki seiñ khynroo wa kiwi ki jait seiñ deiwa e ya Rs. 1 lak yow pynman ya kiwa boon ki jait kaam nadooh ki pynsñiawthooh paidbah, ki kaam wa yatoh waka puræ puthi wei da em 1155 tylli ki seiñ wa da yoh yarap.
Ynne ka sngi da e kti ya ki 37 tylli ki Cheque hapoh ka Yess! Meghalaya, ka Green Meghalaya waka SHG Movement kiwa da kynjoh T. 1.25 klur.
Kiwi kiwa da klam toh ka Santa Mary Shylla kawa da kyntu wow chim kabu ya ka CM Elevate, u Wailadmiki Shylla uwa da yaroh ya u Montri Rangbah deiwa ong wa adnood u ya ki khynroo wa yoh Montri Rangbah ki da uwa tip wow pyrkhat ya ki.
Neiliang won u Lahkmen Rymbui da ong u wa embhah wow yoh ya ka sorkar kawa pynku ya ki warep, ki bru wa yaleh Sports, kiwa seiñ khih wa kiwi de ki kaam wa da yarap nadooh ya kiwa da heh wa kiwa da tymmen wei ym jooh em yoo sorkar u kam kani kawa chit mynsien u kreh.
Ha kani ka sngi u Conrad da lai pait u leh ya ka Kiang Nangbah Government College waka Jowai Civil Hospital, Ialong.
Discussion about this post