Ynne ka sngi u Montri Rangbah ka jylla, u Conrad Sangma da wan wai u ya ki Collective Marketing Centre (CMC) ha Thadmuthlong ka yong ka Synroplang VO, ha Changpung Pohchnong ka yong ka Changpung Farmers Union waka Prime Hub ha Laskeiñ wei da wan chimbynta u leh ha ka Lakadong Festival kawa ar sngi kawa da sdang nadooh ynnin ha Madan Pamsna, Laskeiñ hei emlang u MLA ka Mowkaiaw, u Nujorki Sungoh wa u MLA ka Raliang, u Comingone Ymbon.
Ha kani ka sngi da pait leh ya ki kor wow ah wei wow tylliat ya u Sy’iñ Chyrmit wa ka kor wow thaw ya ka Curcumin Content u chyrmit namo hadooh katwon bha u chyrmit.
U Nujorki Sungoh hawa e yei klam da e khublei u ya u Conrad Sangma wa da wanrah u chiboon ki kaam pynroi ha ka thaaiñ.
Da ong u leh wa ki bru toh u sñiawtre ki ya ki Scheme wa yoh ki na ka sorkar deiwa ong hawa pdiang ya ki emkaam wow man kiwa kreh chitom ha kiwon kiwon ki liang.
U Conrad Sangma hawa e yei klam da ong u wa kani ka Mission toh kawa da sdang soo snem nachwa wow pynku ya i pynmih ya u Chyrmit Lakadong.
Da ong u wa nachwa ya ki sahep da phah wow saam 1-2 Ton u symbe tangwa ymtoh u kut i du heitæ heiwa da emkaam wow pyntikna wa ku i yoh i laa ki warep deiwa e sikai ya ki ha kiwa boon rukom wei da sdang noh ya ka Mission Lakadong.
Heiyatoh wa i Curcumin, da ong u wa nachwa da ye u sai ya i Curcumin na u Sy’iñ Chyrmit deiwa phah cha Kolkata iwa chimpor hadooh 10 sngi tangwa katni da ye u leh pyn heini hapoh 10 minit donhi.
Da ong u wa emkaam u minot wow kreh wei wow em i krehlang chirup khnang wow ye u poi cha ka thong heiwa ka sorkar daw e ko i kyrchaan wa pura.
Ha kani ka sngi da booh leh ya ki dukan wa dai ya ki tiar yong ki SHG, ki VO wa kiwi kiwi wei da saam leh ya ki khusnaam cha kiwa jop ha ki yakob waphær waphær yong kani ka lympung.
Ya ki kyntien pdiang sñiawbha da yoh na u Deputy Commissioner ka West Jaiñtia Hills, u Garod LSN Dykes, ki kyntien lamphrang na u Commissioner & Secretary ka chnat Agriculture, u Dr. Vijay Kumar D wa ki kyntien khublei na u Director ka Horticulture u L Ch Marak.
