Ka Thangbuli Youth Social Welfare Club ynnin ka 23 tark da sdang ko ya ka 10th H. Sayoo Inter Group Football Tournament heiwa u MLA ka Mawphlang Constituency, u Eugeneson Lyngdoh da man u kam u kongsan wow wai pyrda ya kani ka lympung yalehbol.
U Chairman Sports ka Club, u H.P. Tariang hawa e yei klam lamphrang da khana u ya ki kaam wa da leh ka Club heiwa da pynmih leh kattu katni ki khynnah wow mihkhmat ya ka jylla ha ki kyrdan waphær waphær.
U Eugeneson Lyngdoh hawa e i klam da pynsñiaw u yei mynsien wa kmen wow embynta wa ka Club ha kani ka sngi neibhah wa yoo sakhiat u yei em mynsien ki khynnah ha ka Sports khamtam ka Football.
Da ong u leh wa kam uwa yalehke warim ka ri kmen u wow tip wa em uwi na ki khynnah kani ka Club uwa dang em katni ha ki lympung waheh kam ka ISL uwa da psiah wa ka Club FC Goa.
Khaddooh da kitbok u ya ka Club wow dang lai chaphrang wei kamjooh ya ki dhab kiwa wan chimbynta ha kani ka lympung.
Ha kani ka sngi da emlang leh u Montri Sorkar, u Lahkmen Rymbui, u K. Passah, DSO ka West Jaiñtia kiwa da man kam ki symbood kongsan wa kiwi de ki waheh.
Ha kani ka sngi da sdang ya kani ka lympung da ka yalehke hapyrdi ka Amsyiar pyrchah ya ka Amdohkha heiwa ka Amsyiar da man ko kam kawa jop.
Da pynkut ya ka yalang da ki kyntien khublei na u Secretary ka Club, u Tremendous Tariang.
