Ynne ka sngi, u Montri ka sorkar jylla, u Sniawbhalang Dhar, u MLA ka Jowai, u Wailadmiki Shylla ki MDC ka JHADC wa kiwi kiwi da wan wai ki ya ka yung krehkaam ka Seiñ Kynthai ka Dorbar Chnong Khliehtyrshi wa ar mala ya kawa da chna ha i lut wa T. 50.57 lak tam.
U MDC ka thaaiñ, u Lakhon Dkhar hawa e yei klam da ong u wa waroh chi kattu hawa jied ya kiwa mihkhmat heipor Election jooh kyruiñ ki cha ka Khliehtyrshi ka wow pynjop ya ki wei hadien won ym em iwon iwon i yoh myntoi ka chnong tangwa kattni dei em u Wailadmiki Shylla kam u MLA, da yoh ko chiboon ki kaam pynroi.
Da kyntu u leh ya ki paidbah wow jied biang ya u Wailadmiki ha kani ka kynti neibhah oo da man u uwa da chemphang wow wanrah ya ki Scheme katwa kiwi won ki kyrtong daw sdang ki nawa sdang din pa din.
U Wailadmiki Shylla da ong u wa kattu deiwa wai ya kani ka yung krehkaam ka seiñ kynthai ym emkaam de ki wow paan bor na ki waheh chnong wa ki skur wow pyman yalang wei wow booh ya ki kot ki sla wa ki tiar ki tar.
Da kynmoo u yei por ki ar snem wa dadep hawa em ka khlam COVID-19 heiwa da thooh ki laad wow e yarap katwa ye cha ki manyung.
Chooh da ong u wa ka Jowai Constituency man ko ka Headquarter ka West Jaiñtia Hills heiwa du na kani ka District da em san MLA wei pyn san ngut em ki ha ka sorkar iwa eh wow yoh kamni.
Da ong u leh wa ha ki san snem wow wan toh wow kreh neibynta i emkaam yong ki paidbah ymtoh neibynta i kwah yong ki donhi.
Neiliang u Sniawbhalang Dhar da ong u wa heiyatoh wa ka Khliehtyrshi neiliang yong oo da phah u ya u Wailadmiki wa emkaam u wow kreh u neibynta kani ka chnong. Da pynkynmoo u leh yeiwa da ye u wai hadooh 7 tylli ki mooyurim ki kreh ha ka yalang wa da pynman ha Mihmyntdu iwa ym jooh em jia kamni nachwa.
Da khana u leh wa na kiwa boon ki Constituency ym jooh em wa johkhe wow yoh MLA da uwa dang khynnah deiwa kdaw ya u Wailadmiki uwa man uwa dang khynnah.
Da kular u leh wow e ya ka Scheme wa hapoh T. 30 lak hei wow kreh ya ka kynroh hadooh ka Yung Dorbar wa ya ka madan hakhmat kani ka yung wei wow kreh mar sdang u snem thymme.
Kiwi kiwa da klam kynthup ki ya u Waheh Chnong ka Khliehtyrshi, u Kitbok Rymbai heiwa da e kti u leh ya ka dorkhat wow paan ya ka kynroh wow kreh ya ka Yung Dorbar, wow siang ya ki sarok wa kiwi kiwi.
Ha kani ka sngi da saam leh ya ki Work Order wa mar T. 3 lak cha ka Loompyrdi wa ka Kyortyrkhang kiwa em ha Khliehrtyshi.
Ya kani ka sngi da pynphooh ya ka da ki chaad.
