Ka All Tamil Nadu Students’ Association (ATSA) lyngba kiwa kitkaam yong ka kiwa kynthup ya u Vishnuram P, President, u Rajarajacholan, Joint Secretary, u Gideon Bala Singham, Treasurer wa u Ragu, Advisor da wan ki na Tamil Nadu wow yachem wa kiwa yahkhmat ka KSU ha Shillong wow ya syllok hajrong chiboon ki phang wa ktah ya ki paaid tre chnong ki North East wei kamjooh ki South India.
Kiwa yahkhmat ka ATSA da pynsñiaw ki yei eh ki paaid Tamil wa kiwi ki paaid Dravidian hapoh ri India wei kamjooh leh kiwa yahkhmat ka KSU da pynsñiaw ki yei eh wei chem chitom ki Khasi.
Kini ki ar seiñ da ya syllok ki leh hajrong i chah yooh beiñ ki nong North East wa ki nong South India la ha ki aiñ sorkar pyrdi, i chah pynbor pynemkaam ya ka ktien Hindi, i chah buhai chnong roi ha kiwi won ki jaitbru la ha Meghalaya næ ha Tamil Nadu.
Da yaklam bniah leh kammon wow thooh ki laad ki luti wow yada ya ki tre ri tre muluk ha Tamil Nadu wa Meghalaya yow kyntu ha ka liang ka puræ puthi wa ka yoh ka kot.
Neiliang kini ki ar seiñ da rai ki wa neinei chakhmat wow ya krehlang hawa yatoh wa ki phang kiwa ktah yei bha i miat wa ka yap ka im ki paaid tre chnong ha North East wa ha South India.
Ka ATSA da kular ko leh wow yarap ya ki Khasi wa lai puræ kiwa em ha Tamil Nadu lada chem ki ya iwon iwon i eh.
Ha chwa ini, ka ATSA da yachem ko leh wa kiwa yahkhmat ka Naga Students’ Federation (NSF) ha Guwahati wei kini ki seiñ da chim ki leh ya ka rai wow ya krehlang neini chakhmat.
Discussion about this post