Hadien wa thai i dawa wow pynkrehkaam ya ka ILP hapoh ka jylla, ynne ka sngi u MLA ka Assam na North Karimganj, u Kamalakhya Dey Purkayastha da wan yachem u ya u Montri Rangbah ka jylla, u Conrad K Sangma wow pynsñiaw yei pyrchah yong oo hajrong ini i thmu wei kamjooh leh wow pynneh yei chongsuk hapyrdi ki Khasi wa ki Bengali ha Shillong.
Hawa yaklam wa kiwa pathai khubor ha Shillong, u Purkayastha da ong u wa neiliang u Conrad da pyntip u wa hadooh katni ympu pynkrehkaam ya ka ILP ha Meghalaya, tangwa i thap pyrtuid ya ki bru kiwa na baar wa wan psiah chapoh jylla da lai i chaphrang katkam ki kyndon ka sorkar.
Katkam ka dorkhat uni u MLA wa da e u ha u montri rangbah da pynsñiaw u wa lada pynkrehkaam ya ka ILP ha Meghalaya daw wanrah ko yei eh i khoo ya ki bru na India kiwa wan emkaam cha kani ka jylla, wei daw pynthut ko leh ya ki paidbah na kiwi ki jylla kiwa lai lyngba ka Meghalaya, kam na South Assam, Tripura, Mizoram wa Manipur.
Heiyatoh wa i yaphær wa mih na i jia ha Ichamati wa Majai, da ong u wa neiliang u Conrad da pyntip u wa ka sorkar da chimkhia ko yei chim kabu ki damok kiwa kwah wow pynthut yei chongsuk.
Heijooh i por u Purkayastha da ong u wa neibynta i chongsuk ka jylla Assam wa Meghalaya emkaam yei yakrehlang khamtam wow pyndooh yei eh i khoo waroh deiwa pyntip u leh wa hapoh ka Constituency wa mihkhmat u na Assam em ki Khasi kiwa chong wa sah, heiwa oo kam u MLA pyntikna u wa ki Khasi ha ka Constituency u chong chngaaiñ ki.
