Shillong: U kyrtong president ka National Democratic Alliance (NDA) wa yahkhmat da ka BJP, u Ram Nath Kovind da ong u wa ym em i yaphær hapyrdi ki heh wa ki khian neibhah waroh man salonsar ki hapoh ka ri.
Hawa yaklam wa ki MLA ka jylla ynne ka sngi, da yalap u wow paan yei kyrchaan na ki wow jied ya oo kam u President ka ri.
Da ong u “Ka jylla Meghalaya toh kawa khian tangwa ym em yaphær ko na kiwi tawon ki jylla ka ri wei chim O wa yahaap kyrdan ko wa ka Utter Pradesh, Bihar, Tamilnadu, Maharashtra wei em phi i jooh i hok kam kini kiwi”.
“Ka jylla yong phi (Meghalaya) toh kawa mahajon ha ka riti dustur wa ka spah rymaw wei ki bru leh man ki kiwa da stat da tip” da pynrap u Kovind.
Da ong u wa ka thaiñ mihsngi man ko ka thaiñ wow wai laad wow kynrong kyntu ya i yoh i khayi ha waroh kawi neibhah wa man ko ka thaiñ wa yabi wa kiwi ki ri hapoh South East Asia.
Da pyntikna u wa lada chah jied u kam uwa mihkhnat ka ri daw yieñ u wow pyndep hok khlem da pait chilliang, wei daw leh u yeiwa emkaam katkam wa da pynkhamkti ya oo da ka riti synchaar ka ri.
Ha Kani ka yalang da emlang u Montri ka tnat Rural Development ka ri, u Narendra Singh Tomar, u General secretary ka BJP, u Ram Mahadhav, u Shibun Lyngdoh u President ka BJP Meghalaya wa ki dkhot ka BJP ha ka jylla.
Katwa ki MLA kiwa dawan ap ya kani ka yalap kynthup ki ya u Dr Donkupar Roy u president ka UDP, u Paul Lyngdoh, u Titusterwell Chyne wa u Dr Jemino Mawthoh, u MLA ka NPP uwa man leh u Election Agent yong u kyrtong ka NDA ha Meghalaya u James K Sangma wa u MP ka Tura, u Conrad K Sangma uwa da pyllai ya kani ka yalang.
Discussion about this post