Ka heh ka All India Congress Committee (AICC), ka Kumari Tilotama kawa man leh ka Observer ka Vote Bachao-Desh Bachao da wan ko ynne ha Jowai wow pynsñiawthooh ya ki daw wa dawa ka Congress chirup wa ka INDIA Bloc wow pynhiar chuki wei wow pynchitom ya u Chief Election Commissioner, u Gyanesh Kumar.
Ha kani ka sngi da emlang u EG War, uwa man u General Secretary ka West Jaiñtia Hills District Congress Committee, u Emlang Laloo uwa man u President ka Nartiang Block Congress Committee wa kiwi de.
Ka Kumari hawa yaklam wa kiwa pathai khubor da ong ko wa katni da emkaam bha wow pynmih madan ya ki kaam ka sorkar NDA wa yahkhmat da ka BJP neibhah wa da booh ya ka mynried hei maa deiwa leh ya ka Special Intensive Revision (SIR) ya ki Electoral Roll heiwa da pynwiar ya ki pyrtuid kiwa boon khamtam ki bru ki wym kyrchaan ya ka BJP.
Da kdaw ko wa ha ka SIR lada wiar i pyrtuid ki 2% ngut ki bru man iwa ye u pdiang tangwa u wiar won da 15% hadooh 20% man iwa ymye u pdiang.
Ka Kumari da pynkynmoo ko wa u heh ka Congress, u Rahul Gandhi da sdang u wow yakhun yei hok kiwa thap Vote nadooh u 2005 wei katni u CEC, u Gyanesh Kumar toh uwa pynlai da u Narendra Modi wa u Amit Shah uwa da lai lait leh ya ki 2 ngut ki Election Commissioner ka ri deiwa pyndam ya ki pyrtuid ki bru katwa ngait u.
Chooh chooh da ong ko wa em ki yung ha ki kattu katni ki jylla kiwa thoh ya ka House No. 0 wei ini man iwa bakla iwa ktah ya ka imlang sahlang.
Da ong ko wa ya u CEC da yada da ka sorkar wei ini man iwa maa bha katwa dang synchaar ka BJP heiwa wot ya ki rel, ki lieñsuiñ wa ki Bus da khang wow lai cha Ramlila Maidan wa em ha Delhi wow yakhih dawa hiar chuki ya u Gyanesh heiwa da wan chimbynta da ki palat 10 lak ngut ki bru.
Heijooh i por da ong ko wa ya u Rahul Gandhi wa ka Congress da wan kyrchaan da ka INDIA Bloc wa kiwi ha Ramlila Maidan neibhah wa yoo ki yeitæ i maa kamtæ ki leh da dawa ki wow hiar chuki noh u CEC.
Discussion about this post