Shillong: Ka Hynñiewtrep Youth’s Council (HYC) ynne ka sngi da pyllait paidbah ko ya ki 29 tylli ki daw wa ki paidbah toh u tip ki wei wow kyntait ya ka Congress ha kani ka election ha ka 27 tarik uni u bnai.
Katkam i ong ka HYC ka party Congress da yoobeiñ ko ya ki tre ri tre muluk wei man ko ka party kawa pyndooh yei angnood ki tre muluk wow synchaar pyn daki hi ha ka jylla neibhah wa wailad ko ya ki wymtoh ki tre ri wei da e ticket ko leh ya ki wow yakhun ya ka election.
Katkam i ong ka HYC ka Congress toh kawa bood yong thlah hieh yeiwa ong ki heh na Delhi, ka wym chimkhia wow kdoh yei wan psiah ki bru na baar wei da kyntait ko ya ki aiñ yada ri wa kynthup ya ka ILP, ka party ka wym chimkhia wow pyndooh ya ki kaam baam-tooh, ka wym ye u pynbait ya u pood u ang wa kiwi kiwi.
Kiwa kitkaam ka HYC wa kynthup ya u President, u Peter Lawai wa u General Secretary, u Robertjune Kharjahrin da kynthah ki yei klam u Dr. Mukul ha ka Dorbar Tlang kawa da man ha u Kmaichonglad 2017 wa ka sorkar jylla ymem pynbor ko ya ki paidbah wow pynpsiah pyrtuid Aadhaar wei oo leh ym em thap pyrtuid u ha u Aadhaar tangwa hadien won da pynmih hukum u wa ki paidbah emkaam wow leh Aadhaar ki.
Hawa jubab won ya ka phang kylli wa neiyi i daw ka HYC da pynbna ko wow kyntait du ya ka Congress neiliang u Robert da pyntip u leh wa ka seiñ da pynbna ko leh ya ki daw wow kyntait ya ka BJP ha kani ka election nalor ki 16 tylli ki daw wa kynthup ya i thmu wow wanrah i yapiah, i wym ye ko wow pynbait ya u pood u ang wa ka jylla Assam wa synchaar ka BJP wa kiwi kiwi.
Discussion about this post