Shillong: U CEM ka Khasi Hills Autonomous District Council (KHADC) u HS Shylla ynne da wanrah u ya ka Bill kawa dadep pynkylla kawa tip kam ka Khasi Hills Autonomous District (Khasi Social Custom of Lineage) (First Amendment), Bill, 2018 kawa da em kyrpang i bynta wow e jait cha u chynrang.
Ha ka Section 2 yong ka Principal Act, da thap ya kiwa boon ki kyntien wa thymme kam ka Ring Bia lane ka Shaw Bhoi , Duh Iing, Infant, Khasi Custom of Lineage, Khasi Custom of Marriage, Non-Khasi, Rangbah Kur, Tribunal, Tip Kur, Tip kha.
Ha kani ka Bill wa wanrah da em i bynta chaphang ka dustur wa tip kam ka Ring Bia lane ka Shaw Bhoi kawa bood da ki kattu katni ki kur kiwa em ha Ri-bhoi heiwa u Duh Iing u khon chynrang ye u bia wa ka dkhar yow ye u chim jait ki khon dei yong oo wei katkam kani ka Bill wa katni ki khon yong uni u chynrang u kheiñ ki kam ki Khasi lada bood ki ya ki kyndon man Khasi katkam Section 3 kani ka aiñ.
Duh Iing hapoh kani ka Bill mut ka manyung kawa ym em khon kynthai.
I bynta ka Section 3 wa da pynkylla toh wow pyndooh yei man Khasi kiwon kiwon kiwa chim kur dei yong u pa tangwa ym ktah ko heiyatoh waka Ring bia/Shaw Bhoi.
Kani ka Section da ong ko wa kiwon kiwon ki Khasi kiwa chim kur da i yong u pa kamjooh ki khon yong kiwa chim yei kur yong u pa u dooh noh ki yei man Khasi wei daw dooh ki leh waroh ki hok wa yoh kiwa man Khasi tangwa ym ktah ko ya kiwa bood ya ka Ring bia namo ka Shaw Bhoi.
Katkam kani ka Bill ki kyntien wa ong “Khasi Custom of Lineage” iwa mut i rukom im wa man leh ka dustur riti heiwa ki Khasi chim ki yei kur ka bei.
Ha kani ka Bill ki kyntien “Khasi Custom of Marriage” mut i rukom bia katkam ka dustur riti hajrong ka yurim “Tip kur tip kha” ha ka imlang sahlang Khasi Society heiwa da em artylli ki Kur ki jait wa phær wei ym em ka yatoh kur toh jait.
Ha kani ka Bill da thap leh yei kyntien “Tribunal” iwa mut ka Tribunal wow chna da ka Executive Committee (EC) ka wow chong bichaar ya kiwon kiwon ki ujor wa wanrah ki kur ki jait wa kamjooh ki ujor yong ki bru samen.
Ka Section 10A kawa thymme da thap ya ka hadien ka Section 10 (6) kawa da em chwa kawa ong ki waheh chong namo ki Rangbah Kur wymtoh u dam ki wow ujor namo wow pyntip cha ka Registration Authority namo cha EC lada em ki Khasi kiwa chongkha khleh, i tyngkheiñ ya ka dustur riti, i pynkylla yei kur i jait iwa pyrchah ya ka aiñ katkam ki kyndon kani ka aiñ.
Hadien ka sub-clause (10) ka Section 12, da booh sa kawi ka sub-clause (11) kawa ong, “Ym chah kylla ya i kur i jait deiwa leh ya ka affidavit ha khmat ka yung bichaar, Magistrate, Notary Public or Authority lait noh du hapoh ki kyndon kani ka aiñ.”
Ka section 13A kawa thymme da klam ko chaphang Tribunal on Khasi Social Custom of Lineage. Kani ka Tribunal u em ko u Chairman, Vice Chairman wa le ngut ki dkhot ki wow thung da ka EC wow bichaar ya kiwon kiwon ki phang kylli wa mih chaphang ka Khasi Social Custom of Lineage.
Ya u Chairman wa Vice-chairman daw jied na kiwon kiwon ki Khasi wa man ki muktiar wei da kreh 7 snem kam ki muktiar.
Discussion about this post