Shillong: “Ka jylla Meghalaya da kylla ko kam ka thaw wa haprydi ha ka kaam pynlai wei wow khayi Drugs wei ini da man ko kawa maa ya ki khynroo khyllood ka Khasi-Jaiñtia”, da ong kawa mihkhmat na Nongshken Constituency, ka Grace Mary Kharpuri, ha ka sngi wa ar ka dorbar tlang ka Khasi Hills Autonomous District Council (KHADC) ynne ka sngi.
Hawa wanrah ya ka ‘Motion’ hajrong ka phang ki bynta kam ki Dorbar Shnong wow kitkhlieh ki ya i roi ka dih drugs wow pynsñiawthooh leh ya ini i kaam wa iwa ktah i da ong ko wa da man i iwa joor katkam wa yoo ha ki laad pathai khubor heiwa nadooh kiwa dang 14 snem leh da kyrni ki ha kini ki jait dih.
Da kdaw ko leh deiwa e nongmuna kam ka Child Line da chem ko 70 na ki 100 toh kiwa syu Denrite wa kiwa dih bhang wei kini ki khynnah manda heh ki lada ym em poisa ki wow pynhun ya iwa emkaam ki daw poi ki hadooh u pood wow tynyap bru.
Kamtæ da sñiaw ko wa da toh i por wow ksohkti lang yow krehkaam wow pyndooh ya kini ki jait dih wei ka District Council em ko i bynta wa khroo wow yaleh pychah ya ini nadooh ki Executive Member hadooh ki Rangbah Shnong wei emkaam leh wow booh ya ki Rehabilitation Center.
Neiliang u Adelbert Nongrum, MDC ka Jaiaw da ong u wa kani toh ka wow pynkhyrngiat ya waroh kiwa da yohthiah wow thooh laad kammon wow yaleh wow pyndooh yei roi ki drugs wei wow pynchitom leh ya kiwa khayi Drugs deiwa kyrpaad leh ya ki Dorbar Shnong wow chimkhia ki ya kani ka kaam.
U HS Shylla, CEM ka KHADC da pynsñiaw u leh yei mynjur ya ini deiwa ong wa ki Rangbah Shnong toh u chimkhia ki wei neiliang ka Executive Committee daw thoh ko cha ki Dorbar Shnong, ki Balang, ki seiñ kynroo khyllood wa kiwi kiwi wow yieñ pyrchah hajrong i pynemkaam Drugs.
Discussion about this post