15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Wanrah naam u Ajay Dkhar yaka East Jaiñtia, u khon kiwa mylla nongsngi deiwa mih pyrtuid haka thup Top 10 ka Commerce

Advertisement ad1
Advertisement ad1
Advertisement ad1

Khliehriat: Ynnin ka sngi ka Meghalaya Board of School Education (MBOSE) da pynbna ko yaka Result HSSLC yong ki khynnah wa puræ haka Science waka Commerce Stream, heiwa na ri-loom Jaiñtia u khynroo Ajay Dkhar uwa naka skur Khliehriat Higher Secondary School, uwa chong wa sah haka chnong Mukhep, East Jaiñtia Hills District, da mih pyrtuid u haka thup Top 10 ka Commerce Stream deiwa yoh yaka kyrdan wa 6 deiwa yoh Distinction haka subject En,Ac,Ec,Bs uwa man leh samen uwa poi cha kani ka kyrdan na kiwa lai puræ ha ri-loom Jaiñtia waroh kawi.

U Ajay Dkhar hawa yaklam wa uwa thoh khubor da ong u nyngkong e ngooh u ya u Blai Kynrad wa da emlang u wa oo nadooh wa sdang hadooh kani ka sngi wada poi u cha kani ka kyrdan heiwa da ye u wow rah ya i naam i burom yaka yung ka sem yong oo, ya ka chnong ka thaw, ya ka skur wa ka District hi waroh kawi.

U Ajay da kyntu u leh ya kitu ki para khynroo kiwa yaleh yaka Board Exam yong uni u snem 2020 kiwa ym em u Pass bha khamtam kitu kiwa sahkut deiwa pynchlur u ya ki wow pyrchang biang ki ha u snem wow wan wei ym hoi u dooh kyrmen ki wa daw poi ki cha ka thong ka yong ki deiwa ong u leh emkaam toh u kreh chitom wei wow minot.

Hawa kylli chooh chooh ya i lai luti yong oo hei im u, da ong u wa nadooh dang khian u da myllien u wow pynlut por hei khreh kot donhi, da ong u leh wa haka chi sngi da pynlut por u kamwa 2 lane 3 kynta wow khreh kot, khamtam ha kani ka Board Exam, deiwa ong u leh wa nadooh wa dang khian kwah u wow man kam u Chartered Accountant (CA).

Hawa yaklam wa ka bei u ka Empor Dkhar da pynsñiaw ko yei sñiawngooh ya u Blai hadooh kattæ kattæ wa da emlang u wa u khon yong ka kamjooh yaka yung ka sem hi waroh kawi, “I kam ka bei u pa yong oo da yoo i ya i long i man yong oo toh iwa yoosuk bha wa pynlut por u hei khreh kot donhi neitæ i daw i kam ka bei u pa hanlada em i ha pyrdi i dooh i duk leh da kreh chitom i u thooh ki laad ki luti wow pynlai skur ya u khon yong i.”

Da ong ko leh wa ym em kiwa kyrchaan ya ka yung ka sem yong ki, wei da i kreh chitom hi ka yong ki wow thooh laad thuh luti wow pynlai skur ya u khon heiwa da em ki 3 ngut ki chipayu wei napyrdi ki 3 ngut, u Ajay man u uwa khian dooh. Ka bei u pa yong oo toh kiwa khih mylla nongsngi don hi.

Ka Empor Dkhar da e khublei kyrpang ko yaka Khliehriat Higher Secondary School nadooh u Principal, kiwa sikai wa da kreh chitom ki wow kyntu kynrong ya ki khynnah skur, wei nei kreh chitom yong ki te poi u khon ko kat cha kani ka kyrdan, da e khublei ko leh ya ki dkhot, kiwa pynlai yaka skur kamjooh yaka SMC yong kani ka skur.

Share this:
Previous

Da u khoo e sñiawbha ka FKJGP cha ka chnong Padu-Bah

Next

Sa 10 ngut kiwa yoh COVID-19 ha Shillong