Shillong: Ka Congress kawa em ha ka liang pyrchah, ha ka yung dorbar ynne ka sngi da wanrah ko ya ka ‘No Confidence’ næ i wym chaniah ya ka sorkar Meghalaya Democratic Alliance (MDA), wa da yahkhmat da u Conrad K Sangma yong ka NPP kam u Montri Rangbah. Ya ka No Confidence da pdiang da u Lamphang ka yung dorbar, u Metbah Lyngdoh wei katkam ki kyndon wa da booh por wow ya pynyoo nia mynstep ka sngi ha ka dorbar nadooh i por 11 waje i step.
Ha i wanrah ya i wym chaniah da ka liang pyrchah ynne ka sngi, toh hajrong ka yurim wa da pynbaad yei wym hoi krehkaam ka sorkar MDA ha kiwa boon ki liang.
U Lamphang hachwa wow pynbna wa da pdiang ya ka ‘No Confidence Motion’, da phah u leh wow yieñ ya ki MLA ka liang pyrchah kamwa da soi, katwa wym toh u duna ya ka 10 ngut, wei kiwa da soi ha ka chithih wa da phah cha u Lamphang toh u Dr. Mukul Sangma, u Zenith M Sangma, u Winnerson D Sangma, P T Sawkmie, HM Shangpliang, Dikkanchi D Shira, Miani D Shira, George B Lyngdoh, M Rapsang, Kimfa S Marbaniang wa u Lazarus Sangma.
Hadien wa ka yung dorbar da pdiang ko ya i wym chaniah wa da wanrah da ka liang pyrshah, ka kynhun synrop ha ka MDA da pynman ki yaka yalang wa jhan yow pyntikna wa ym em i chah ktah ya ka sorkar.
Hawa klam hadien wa da wai ka yalang, u Montri Rangbah ka jylla, u Conrad K Sangma da ong u wa ka yalang yong ka MDA man ko yow pyntikna wa waroh ki MLA wa em ha ka sorkar wow poi ki mynstep ka sngi wa kynthup ki MLA kiwa chitom wa kiwa chah ktah ha u COVID-19 ha ki sngi wa da dep. Da ong u wa ka MDA da pynkhreh bha ko leh wow yatai nia, deiwa klam che wa ka sorkar ym chah ktah ko na ini i wanrah No Confidence yong ka liang pyrchah.
U Conrad da ong u wa lada ka liang pyrchah ka kwah ko wow wanrah ya i klam lyngba ka No Confidence Motion, ka sorkar leh man ko kawa smat wow pdiang, deiwa pynrap leh wa ka sorkar MDA ka yatylli ko wow jop ya ka yatai nia mynstep ka sngi.
